ރާއްޖޭގައި ގެސްޓް ހައުސް އިންޑަސްޓްރީ ކުރި ނާރަނީ ހަމައެކަނި ޓެކުސް ރޭޓު ބޮޑު ވެގެނެއް ނޫން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެެއެވެ. 

ޖީއެސްޓީއާއި ޓީޖީއެސްޓީ ބޮޑު ކުރުމަށް ސަރުކާރުން ހުށަހަޅާފައިވާ ބިލާ ގުޅޭގޮތުން ކަމާ ގުޅުންހުރި ފަރާތްތައް މަޖިލީހަށް ހާޒިރުކޮށް ކުރިއަށް ގެންދިޔަ މަޖިލީހުގެ އާންމު ކޮމެޓީގައި ވާހަކަދައްކަވަމުން، ގެސްޓް ހައުސް އެސޯސިއޭޝަންގެ އެކްސްކޯ މެންބަރު އަހުމަދު ވަހީދު ވަނީ މި ވަގުތުގައި ޓެކްސް ބޮޑު ކޮށްފިނަމަ ގެސްޓް ހައުސްތަކަށް ބޮޑެތި ގެއްލުންތައް ވާނެ ކަމަށް ވިދާޅުވެފައެވެ. 

އެގޮތުން، އޭނާ ވިދާޅުވީ، މިހާރު ހުޅުމާލޭގެ ގެސްޓް ހައުސް ތަކުގެ އެވްރެޖް ރޭޓަކީ 49 ޑޮލަރު ކަމަށެވެ. އަދި އޮންލައިން ޕްލެޓްފޯމް ތަކުގައި އެ ރޭޓް އަޕްލޯޑް ކޮށްލުމަށްފަހު ޓެކްސް ކަނޑާލުމުން ޖެހެނީ 44 ޑޮލަރު ކަމަށެވެ. އަދި އެއިންވެސް 10 ޑޮލަރު ނުވަތަ 100 ރުފިޔާ އެއާރޕޯރޓް އިން ގެސްޓްހައުސް އަށް ގެނައުމަށް ހޭދަވާ ކަމަށާ، އެއީވެސް ހޭދަވާ އިތުރު ޚަރަދުކަމަށް ގެސްޓްހައުސް އެސޯސިއޭޝަނުން ވަނީ ފާހަގަކޮށްފައެވެ. 

އެހެންކަމުން ޓީޖީއެސްޓީ 12 އިންސައްތަ އިން 16 އިންސައްތަ އަށް ބޮޑު ކުރުމުން، ލޯކަލް ޓޫރިޒަމަށް ވާނީ 100 އިންސައްތަ ގެއްލުން ކަމަށްވެސް ގެސްޓްހައުސް އެސޯސިއޭޝަނުން ބުންޏެވެ. 

ގެސްޓް ހައުސް އެސޯސިއޭޝަންގެ ވާހަކަތަކާއި ގުޅިގެން މިނިސްޓަރު އަމީރު ވިދާޅުވީ، އެ އެސޯސިއޭޝަންގެ ވާހަކަތަކުންވެސް، ގެސްޓްހައުސް އިންޑަސްޓްރީ ކުރި ނާރަނީ ހަމައެކަނި ޓެކްސް ރޭޓް ބޮޑުވެގެން ނުވަތަ ކުޑަ ވެގެންކަން ހާމަވާ ކަމަށެވެ. 

މިއާއެކު އަމީރު ވަނީ ގެސްޓް ހައުސް ކުރިއެރުމަށް ހުރި އެހެން ގޮންޖެހުންތައް ފާހަގަކޮށް، އެ ގޮންޖެހުންތައް ހައްލުކުރުމަށް ސަރުކާރުން ކުރަމުންދާ މަސައްކަތްތަކަށް ފާހަގަކުރައްވާފައެވެ. އެގޮތުން، ދަތުރުފަތުރުގެ މައްސަލަ ހައްލު ކުރުމަށް އާރްޓީއެލް ފެރީގެ ޚިދުމަތް ތަޢާރަފް ކޮށް، އެ މަޝްރޫއު ކުރިއަށް ގެންދިޔުމާއި، ރާއްޖޭގެ އެކި ސަރަހައްދުތަކުގައި އެއާރޕޯރޓް ތައް ހެދުމާއި، ރަށްރަށުގައި ފެނާއި ނަރުދަމާގެ ޚިދުމަތް ދޭން ފަށާފައިވާ ކަން އަމީރު ފާހަގަކުރެއްވިއެވެ.