ރާއްޖޭގެ ގާނޫނުއަސާސީ އާއި ގާނޫނުތަކާ އެއްގޮތަށް ނޫނީ އެމަނިކުފާނު މަޖިލީހުގައި ކުރާ މަސައްކަތުގައި ލޮލުފިޔަ އެއް ވެސް ނުޖައްސަވާނެ ކަމަށް ރައްޔިތުންގެ މަޖިލިހުގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
މަޖިލިހުގެ ރިޔާސަތުގައި އިންނަވައިގެން ނަޝީދު އަމަލު ކުރައްވާ ގޮތާ މެދުގައި މަޖިލީހުގެ ބައެއް މެންބަރުން ކަންބޮޑުވުން ފާޅުކުރައްވާތީ އެކަމަށް ރައްދު ދެއްވައި ރައީސް ނަޝީދު ވިދާޅުވީ، ކޮމިޓީގެ ފަރާތުން ގޮތެއް ނިންމާނީ ކޮން ގޮތަކަށްތޯ ކޮމިޓީ ގަވައިދުގައި ފާހަގަކޮށްފައި ނެތް ކަމަށެވެ. އެހެން ނަމަވެސް ކޮމިޓީގެ ފަރާތުން ކަންކަން ނިންމަން ޖެހޭ ކަން އެއީ ކަށަވަރު ކަމެއް ކަމަށް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ، މަޖިލިހުގެ ގަވައިދުގައި ތަފްސީލް ނުކޮށް އޮންނަހާ އިރެއްގައި އެމަނިކުފާނަށް ފެނިވަޑައިގަންނަވާ މަސްލަހަތު ހުރި ގޮތެއްގައި ކޮމިޓީ ވަގުތު ކަނޑައަޅުއްވާނެ ކަމަށެވެ. ނަޝީދު ވަނީ މަޖިލީހުގައި ގައިވައިދުގައި އޮންނަ ގޮތަށް ނޫން ގޮތަކަށް އެމަނިކުފާނު އެއްވެސް ކަމެއް ނުކުރައްވާނެ ކަމުގެ ޔަގީންކަން މެންބަރުންނަށް އަރުވާފައެވެ.
"އަޅުގަނޑު މިތަނުގައި އިނދެ ކުރާ ހުރިހާ މަސައްކަތެއް، ލޮލުފިޔައެއް ވެސް އަޅުގަނޑު މިތަނުގައި ނުޖަހާނެ ރާއްޖޭގެ ގާނޫނުއަސާސީ އާއި ގާނޫނުތަކާއި މިތަނުގެ ގަވައިދުތަކާއި ޑިމޮކްރަސީގެ އުސޫލުތަކާއި އިސްލާމް ދީނުގެ މަތިވެރި، ރިވެތި އުސޫލުތަކާ އެއް ގޮތްވާ ގޮތުގެ މަތިން ނޫނީ،"
ރައްޔިތުންގެ މަޖިލީހުގެ ރައީސް، މުހައްމަދު ނަޝީދު
ނަޝީދު އެގޮތަށް ވިދާޅުވި އިރު، މުޅި މަޖިލިހުގެ ތާރީހުގައި ވެސް ރިޔާސަތުގައި އިންނެވި އެންމެ ހުދުމުހުތާރު ރައީސަކީ މުހައްމަދު ނަޝީދު ކަމަށް ވިދާޅުވެ އައްޑޫ މީދޫ ދާޢިރާގެ މެންބަރު ރޮޒައިނާ ވަނީ އެމަނިކުފާނަށް ވަރަށް ބޮޑަށް ފާޑުވިދާޅުވެފައެވެ.
ރޮޒައިނާ ވިދާޅުވީ، މަޖިލީހުގެ ރައީސަކީ ރައީސުލްޖުމްހޫރިއްޔާއަށް ލިބިވަޑައިގެންފައި އޮންނަވަރު ބާރެއް ލިބިވަޑައިގަންވާ ބޭފުޅެއް ނޫން ކަމަށާއި ރިޔާސަތުން ކަންތައް ކުރާ ގޮތުން މަޖިލީހުގައި މަސައްކަތް ކުރަން ވެސް އުދަނގޫ ވެފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
