ފުލުހުންގެ ބެލުމުގެ ދަށުގައި ހުއްޓާ އިއްޔެ ނިޔާވި ރަޝީދު (މާޓީ) ހައްޔަރުކުރި ފުލުހުން ބޮޑީ ކެމެރާ ބޭނުންކޮށްފައިނުވާކަމަށް ފުލުހުން ބުނެފިއެވެ.

އިއްޔެ ފުލުހުންގެ ބެލުމުގެ ދަށަށް ގެންދިޔަ މީހެއްގެ މެއަށް ތަދެއް އަރައި، ފިޓު ޖެހުން ފަދަ އަލާމާތްތަކެއް ފެނުމުން އޭނާ މަޑަވެލި ހެލްތު ސެންޓަރަށް ގެންދިޔައިރު ނިޔާވެފައިވާ ކަމަށް އޭނާ ބެއްލެވި ޑޮކްޓަރު ފުލުހުންނަށް މައުލޫމާތު ދީފައިވާ ކަމަށް ފުލުހުން ބުނެފައިވެއެވެ. 

އެ މައްސަލަ އާއި ގުޅިގެން ގިނަ ބަޔަކު ނުރުހުން ފާޅުކޮށް، އޭނާ ނިޔާވީ ފުލުހުންގެ އިހުމާލުން ކަމަށް ބުނެފައިވާއިރު، އޭނާ ހައްޔަރު ކުރި ފުލުހުންގެ ބޮޑީކެމް ހާމަކުރުމަށް ވެސް އަންނަނީ ގޮވާލަމުންނެވެ. އެކަމާއި ގުޅިގެން ފުލުހުން ބުނީ އޭނާ ހައްޔަރުކުރުމުގައި ހަރަކާތްތެރިވި ފުލުހުން ބޮޑީ ކެމެރާ ބޭނުންކޮށްފައިނުވާ ކަމަށެވެ. 

ރަޝީދުގެ މަރުގެ މައްސަލައިގައި ފުލުހުންގެ އިހުމާލެއްވޭތޯ ބެލުމަށާއި, އެ އޮޕަރޭޝަނުގައި ހަރަކާތްތެރިވި ފުލުހުންގެ ބޮޑީކެމް ހާމަކުރުމަށް ގޮވާލައްވައި މިއަދު ރައްޔިތުންގެ މަޖިލީހަށް ވަނީ ކުއްލި މައްސަލައެއްވެސް ހުށަހަޅާފައެވެ. ރައްޔިތުންގެ މަޖިލީހަށް މިމައްސަލަ ހުށަހެޅުއްވީ ނައިފަރު ދާއިރާގެ މެންބަރު އަހުމަދު ޝިޔާމެވެ.

މައްސަލަ ހުށަހަޅުއްވަމުން ޝިޔާމް ވަނީ, ރަޝީދު ނިޔާވި މައްސަލައިގައި އަވަސް މިނިވަން ތަހުގީގެއް ހިންގުމަށާއި މި މައްސަލައާ ގުޅުން ހުރި ހުރިހާ މައުލޫމާތެއް ހާމަ ކުރެއްވުމަށް ގޮވާލާފައެވެ. އެގޮތުން، ހޯޑެއްދޫގައި އޮޕަރޭޝަން ހިންގި އިރު ހަރަކާތްތެރިވި ފުލުހުންގެ ބޮޑީކެމް ހާމަކޮށް، އެ މައްސަލާގައި ފުލުހުންގެ އިހުމާލެއްވޭތޯ ތަހުގީގުކުރުމަށް އޭނާ ވަނީ ގޮވާލާފައެވެ.

ރަޝީދު މަރުވި ސަބަބު ދެނެގަތުމަށް އޮޓޮޕްސީ ހަދަން ނިންމާފައިވާ ކަމަށް ފުލުހުން ބުނެފައިވާއިރު އޭނާގެ އާއިލާއިން ވަނީ އޮޓޮޕްސީ ހަދަން ބޭނުން ނުވާ ކަމަށް ބުނެފައެވެ. އެހެންނަމަވެސް، އޭނާގެ ހަށިގަނޑު މިއަދު މާލެ ގެނެސްފައިވާ ކަމަށް ފުލުހުން މިއަދު ވަނީ ބުނެފައެވެ.