ފުލުހުންގެ ބެލުމުގެ ދަށުގައި ހުއްޓާ ނިޔާވި އަބްދުﷲ ރަޝީދުގެ ހަށިގަނޑު ހޯދުމަށް އާއިލާއިން ސިވިލް ކޯޓަށް ހުށައެޅި މައްސަލައިގެ އަޑުއެހުން ނިންމާލައިފިއެވެ. 

އާއިލާގެ ފަރާތުން މި މައްސަލަ ސިވިލް ކޯޓަށް ހުށައެޅީ އާއިލާގެ ރުހުމަކާއި ނުލާ، ފުލުހުންގެ ތަހުގީގަށް އަބްދުﷲ ރަޝީދުގެ ހަށިގަނޑު ޕޯސްޓްމޯޓަމް ހެދުމަށް މަސައްކަތް ކުރަމުންދާ ދިއުމާއި ގުޅިގެންނެވެ. އަދި އޭނާގެ ހަށިގަނޑު އާއިލާއާއި ހަވާލުކުރުމަށް ފުލުހުން ދެކޮޅުހަދަމުން ދިއުމާއި ގުޅިގެންނެވެ. 

އެ މައްސަލައިގައި ކުރިއަށް ގެންދިޔަ އަޑުއުހުމުގައި ފުލުހުން ބުނީ ފުލުހުންގެ މައްޗަށް ބޮޑެތި ތުހުމަތުތަކެއް ކުރެވުމާއި ގުޅިގެން އަދި ފުލުހުން ބަދުނާމުވާ ގޮތަށް ގިނަ ވާހަކަތަކެއް ފެތުރުމާއި ގުޅިގެން ތަހުގީގުގެ ބޭނުމަށް ޕޯސްޓްމޯޓަމް ހަދަން ޖެހޭކަމަށެވެ. އަދި އެއީ ގާނޫނުން ފުލުހުންގެ މައްޗަށް ލިބިދޭ ބާރެއްކަމަށް ދައުލަތުން ވަނީ ބުނެފައެވެ. 

އެހެން ނަމަވެސް އާއިލާއިން ބުނީ އެ މަރަކީ އާދަޔާ ޚިލާފު މަރެއް ނޫން ކަމަށާއި ޕޯސްޓްމޯޓަމް ހަދައިގެން ނިކުންނާނެ އިތުރު ނަތީޖާއެއް ނޯންނާނެކަމަށެވެ. އެހެންކަމުން ހަށިގަނޑަށް އިތުރު އަނިޔާ ނުދީ އާއިލާއިން އެދެނީ އަބްދުﷲ ރަޝީދުގެ ޖަނާޒާ ވީހާވެސް އަވަހަކަށް ބޭއްވުމަށެވެ. 

އާއިލާގެ ފަރާތުން ނޫސްވެރިންނަށް މައުލޫމާތުދެއްވަމުންވެސް އަބްދުﷲ ރަޝީދުގެ ދަރިފުޅު މިކަން ފާހަގަކޮށްފައިވެއެވެ. އަދި އަބްދުﷲ ރަޝީދު ފަރުވާއަށް އެދި އާދޭސްކުރި މިންވަރު ޕޯސްޓްމޯޓަމްއިން ނުފެންނާނެކަމަށާއި، އޭނާ ނިޔާވީ ފުލުހުންގެ ބެލުމުގައި ދަށުގައި ހުރެ، ފަރުވާއާއި ހަމަޔަށް ނުގެންދެވިކަންވެސް ފާހަގަކޮށްފައިވެއެވެ. 

ރަޝީދު ނިޔާވެފައިވަނީ ފުލުހުންގެ ބެލުމުގެ ދަށުގައި ހުއްޓާ އޭނާގެ މެއަށް ތަދެއް އަރައި ސީޒަރގެ ޢަލާމާތްތަކެއް ފެނުމާއި ގުޅިގެން އޭނާ ގދ.މަޑަވެލި ސިއްޙީ މަރުކަޒަށް ގެންދިޔަ މަގުމަތީގައިކަމަށް ފުލުހުންވަނީ މީގެކުރިން ވިދާޅުވެފައެވެ.

އަދި އޭނާ ސިއްޙީ މަރުކަޒަށް ގެންދިޔައިރުވެސް ނިޔާވެފައިވާކަމަށް މަޑަވެލި ސިއްޙީ މަރުކަޒުން އޭނާ ބެއްލެވި ޑޮކްޓަރުންނާއި ޙަވާލާދީ ފުލުހުން އޭރުވަނީ ވިދާޅުވެފައެވެ.

އަބްދުﷲ ރަޝީދުގެ ހަށިގަނޑު ހޯދުމަށް އާއިލާއިން ސިވިލް ކޯޓަށް މައްސަލަ ހުށައަޅައި އަޑުއެހުން ނިމިފައިވާއިރު، އެ މައްސަލައިގައި އަވަސް ނިންމުމަކާއި ހަމަޔަށް ދިއުމަށް މަސައްކަތް ކުރަމުންދާކަމަށް ސިވިލް ކޯޓުން ވަނީ ބުނެފައެވެ.