ފާއިތުވި 7 އަހަރު ދުވަހުގެ ތެރޭގައި ސަރުކާރު ހިއްސާވާ ކުންފުނިތަކާއި ގުލުންހުރި 1400އަށް ވުރެ ގިނަ ޝަކުވާ ހުށައަޅަފައިވާކަމަށް އެންޓި-ކޮރަޕްޝަން ކޮމިޝަންގެ ރައީސް އާދަމް ޝާމިލް ވިދާޅުވެއްޖެއެވެ.
ޝާމިލް މިފަދައިން ވިދާޅުވެފައިވަނީ ބަނޑޮސް މޯލްޑިވްސްގައި މިއަދު ފެށި "މޯލްޑިވްސް އެންޓި ކޮރަޕްޝަން ކޮންފަރެންސް" ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އޭސީސީގެ ރައީސް ވިދާޅުވިގޮތުގައި ދައުލަތަކީ ނަޒާހަތްތެރި ދައުލަތަކަށް ހެދުމުގައި ކުންފުނިތަކުގެ ދައުރު ބޮޑުކަން އޭސީސީއަށް ހުށަހެޅޭ ތަފާތު އެކި މައްސަލަތަކުން ހާމަވާކަމަށެވެ. ފާއިތުވެދިޔަ 7 އަހަރުގެ ތެރޭގައި އޭސީސީއަށް ކުންފުނިތަކާއި ގުޅުންހުރި 1465 ޝަކުވާ ހުށަހެޅިފައިވާއިރު، ޝަކުވާތައް ބެލުމަށްފަހު 234 ރެކޮމަންޑޭޝަން ކުންފުނިތަކަށް ދެވިފައިވާކަމަށް އޭނާ ވިދާޅުވިއެވެ.
އެއާއެކު އޭނާ ވިދާޅުވީ މިގޮތށް ދެވޭ ރިކޮމެންޑޭޝަންތަކާއި އެއްގޮތަށް ކުންފުނިތަކުން އަމަލުކުރޭތޯ ބެލުމަށް އެކަށީގެންވާ ނިޒާމެއް ނެތުމަކީ އޭސީސީއަށް ކުރެވިމަތިވެފައިވާ ގޮންޖެހުމެއްކަމަށެވެ.
އެހެން ނަމަވެސް މިހާރު އޭސީސީގެ މޮނިޓަރިން އެންޑް އެވިލުއޭޝަން ޑިޕާޓްމަންޓެއް އުފައްދައި މިފަދަ ކަންކަން ބެލޭނެ އިންތިޒާމު އޭސީސީގައި ހަމަޖެހިފައިވާނެކަމަށް ޝާމިލް ވިދާޅުވިއެވެ.
"އަޅުގަނޑުމެން އޭސީސީން 234 އެންގުމެއް އެންގުމަށްފަހު ދެންކުރީ ކީއްތޯ އެއީ ތިބޭފުޅުން އަޅުގަނޑުމެން ގާތު އަހާ ސުވާލު. މިސުވާލުގެ ޖަވާބުގާ އަޅުގަނދަށް ދެންނެވެން އޮތީ ވޭތުވެދިޔަ އަހަރުތަކުގަ އެއަށްފަހު އޭސީސީތެރޭގައި އެކަން ބެލުމަށް މާބޮޑު މަސައްކަތްތަކެއް ކުރެވިފައިނެތޭ. އެހެންކަމުން އަޅުގަނޑުމެން މިމަސައްކަތާއި ހަވާލުވެ އެންމެ ފުރަތަމަވެސް ކުރި އެއްކަމަކީ އޭސީސީގައި މޮނިޓަރިން އެންޑް އިވޮލުއޭޝަން ޑިޕާޓްމަންޓެއް އުފެއްދުން. މިހާރު މިޑިޕާޓްމަންޓުގައި ވަކި މުވައްޒިފުން ތިއްބަވައިގެން އެމަސައްކަތް ފައްޓަވައިފި"
އޭސީސީގެ ރައީސް އާދަމް ޝާމިލް
ޝާމިލް ވިދާޅުވީ، ކުންފުނިތަކާއި ގުޅޭ މައިގަނޑު 3 މައްސަލައެއް ފާހަގަވާކަމަށެވެ.
އޭގެ ތެރޭގައި، މުވައްޒިފުން ނަގާ ގޮތާއި، މަސައްކަތްތަކާއި ޚިދުމަތްތައް ހޯދުމުގައި އަމަލު ކުރާގޮތާއި، ސީއެސްއާރުގެ މަސައްކަތްތައް ހިންގާ ގޮތުގައި ކޮރަޕްޝަން އެކުލެވޭކަން ފާހަގަކުރެއްވިއެވެ.
މިއަދު ބަނޑޮހުގައި ފެށި ކޮންފަރެންސްގައި ހިންގުމުގެ ނިޒާމެއްގެ ތެރެއިން އެސް.އޯ.އީތަކުގައި ހުރި ކޮރަޕްޝަންގެ ރިސްކުތައް ނައްތާލުމަށް ކުރެވޭނެ ކަންކަމާއި، މަޢުލޫމާތު ސިއްރުކުރުމުގެ ސަޤާފަތް ދޫކޮށްލާ، ހަރުދަނާ އަދި ދެފުށް ފެންނަ ގޮތަކަށް ކުންފުނިތަކުގެ ހިންގުން ރޭވުމާއި، ޖަވާބުދާރީ ކުރެވޭނެ މެކޭނިޒަމްތައް ޤާއިމުކުރުމާއި ގުޅޭގޮތުން މަޝްވަރާކުރެވޭނެއެވެ.
Advertisement
This content is created and paid for by advertisers and does not involve Voice Journalists
