ކ. މާފުށީގައި ޓްރެއިނިން ފުރިހަމަ ކުރަމުން ދިޔަ އަންހެން އޮފިސަރަކު ގެނބިގެން ފަރުވާ ދެމުން ދަނިކޮށް ނިޔާވެއްޖެއެވެ.

މިކަމާއި ގުޅިގެން ކަރެކްޝަންސް އިން ބުނީ، މޯލްޑިވްސް ކަރެކްޝަނަލް ސަރވިސް (އެމްސީއެސް) ގެ ވަޒީފާއާ އަލަށް ގުޅޭ ފަރާތްތަކަށް އިންސްޓިޓިއުޓް ފޯރ ކަރެކްޝަނަލް ސްޓަޑީޒް (އައިކޯސްޓް) ން ހިންގާ އަސާސީ ތަމްރީން ކޯސް ހަދަމުންދިޔަ ޓްރޭނީއެއް މިއަދު ނިޔާވެފައިވާ ކަމަށެވެ.

އަދި، އަސުރުމާގެ، ސ. ހިތަދޫ މަރްހޫމާ އާމިނަތު ނަޝްވާ ނަސީމް (18 އަހަރު)، ޓްރޭނިންގ ގެ ފެތުމާ ބެހޭ ބައިގައި މިއަދު ހެނދުނު 11:30 ހާ އިރު ފަތަން އުޅުމުގެ ތެރޭގައި އާދަޔާ ޚިލާފު ގޮތްތަކެއް ވާކަން ފާހަގަކުރެވިގެން ވަގުތުން މޫދުން ނެގި ކަމަށާ، އަދި ޕަލްސް ނެތްކަން ފާހަގަކުރެވިގެން ވަގުތުން އަވަސް ފަރުވާ ދެމުން މާފުށީ ހެލްތް ސެންޓަރަށް ގެންދިޔުމުން އެ ސެންޓަރުގެ ޑޮކްޓަރުގެ ލަފާގެ މަތިން އެމަޖެންސީކޮށް ވާނީ މާލެ ގެނެވި، އައިޖީއެމްއެޗް ގައި އަވަސް ފަރުވާ ދެވިފައިވާ ކަމަށްވެސް އެތަނުން ބުނެފައިވެއެވެ. ނަޝްވާ ނިޔާވިކަމަށް އައިޖީއެމްއެޗްގެ ޑޮކްޓަރުން ކަނޑައަޅާފައިވަނީ 14:02 ހާ އިރު ކަމަށްވެސް ކަރެކްޝަންސްއިން ބުންޏެވެ.

Advertisement

މި ހާދިސާއާ ގުޅިގެން އެ ސަރވިސްއިން ވަގުތުން އެކަން އޭނާގެ ޢާއިލާއަށާއި މޯލްޑިވްސް ޕޮލިސް ސަރވިސްއަށް އަންގާފައިވާ ކަމަށާ އަދި ޢާއިލާއާއި ގުޅިގެން މަރްހޫމާ ނަޝްވާގެ ޖަނާޒާގެ ކަންތައް އެ ސަރވިސްއިން ކުރިއަށް ގެންދާކަމަށެވެ. 

މިކަމާ ގުޅިގެން ފުލުހުން ބުނީ، މާފުށީގައި ޓްރެއިނިން ހަދަމުން ދިޔަ ކަރެކްޝަންސްގެ މުވައްޒަފަކު ގެނބިގެން މާފުށީ ސިއްހީ މަރުކަޒަށް ގެންގޮސްފައިވާ ކަމުގެ މައުލޫމާތު މިއަދު ހެނދުނު 11:15 ހާ އިރު ލިބިފައިވާ ކަމަށެވެ.

އަދި އިތުރު ފަރުވާ އަށް އޭނާ މާލެއަށް ގެނެސް އައިޖީއެމްއެޗްގައި ފަރުވާ ދީފައިވާ ކަަމަށާއި އޭނާ ނިޔާވީ ފަރުވާ ދެމުން ދަނިކޮށް ކަމަށް ފުލުހުން ބުނެއެވެ.

މި ހާދިސާ އިތުރަށް ބަލައި ތަހުގީގު ކުރަމުންދާ ކަމަށްވެސް ފުލުހުން ބުނެއެެވެ.

މީގެ ކުރިން ވެސް ސިފައިންނާއި ފުލުހުންގެ ތެރެއިން ވެސް ޓްރެއިނިންގައި ތިއްބާ އޮފިސަރުން މަރުވެފައިވާ ހާދިސާތައް ވަނީ ފެންމަތިވެފައެވެ.