ކުރިއަށް އޮތް އަހަރަށް ސަރުކާރުން ހުށައެޅި ބަޖެޓުގައި ސިއްހީ ދާއިރާގެ ތަރައްގީއަށް 5 ބިލިއަން ރުފިޔާ ކަނޑައަޅާފައިވާކަމަށް ފިނޭންސް މިނިސްޓަރު ވިދާޅުވެއްޖެއެވެ. 

ރައްޔިތުންގެ މަޖިލީހަށް ބަޖެޓު ހުށައަޅުއްވާދެއްވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ ކޯވިޑް ނަވާރައިގެ ތަޖުރިބާއަށް ފަހު ސަރުކާރުން އެންމެ އިސްކަމެއް ދެނީ ސިއްހީ ދާއިރާ ތަރައްގީ ކުރުމަށްކަމަށެވެ. އެގޮތުން މުޅި ސިއްހީ ދާއިރާއަށް ބަޖެޓުގައި 5 ބިލިއަން ހިމަނާފައިވާކަމަށް މިނިސްޓަރު ވިދާޅުވިއެވެ. 

މިނިސްޓަރު ވިދާޅުވީ ސިއްހީ ޚިދުމަތް ލާމަރުކަޒު ކުރުމުގެ ސިޔާސަތުގެ ތެރެއިން ރާއްޖޭގެ 5 ސަރަހައްދެއްގައި ޓާރަޝީ ފެންވަރުގެ ހޮސްޕިޓަލުތައް ތަރައްގީކުރުމުގެ މަސައްކަތްތައް ފެށިގެން ކުރިއަށް ދާ ކަމަށެވެ. އަދި އެ ހޮސްޕިޓަލުތަކުން ދެވޭ ޚިދުމަތްތަކާއި ލިބެން ހުރި ވަސީލަތްތަކުގެ ފެންވަރުވެސް އެތައް ގުނައެއް މަތި ކުރެވިފައިވާކަން މިނިސްޓަރު ފާހަގަކުރެއްވިއެވެ. 

Advertisement

މިނިސްޓަރު ވިދާޅުވީ މި ކަންކަމާއެކު ޓާޝަރީ ހޮސްޕޮޓަލުތަކަށް ހިނގާ ޚަރަދު މިހާރަށްވުރެ ތިން ގުނަ ބޮޑުވެގެންދާނެކަމަށެވެ. އަދި އެއާއެކު ޚިދުމަތްތަކުގެ އަދަދާއި ފެންވަރުވެސް ރަނގަޅުވާނެކަމަށެވެ. 

އޭގެ އިތުުރުން އަންނަ އަހަރުގެ ބަޖެޓުގައި ރާއްޖޭގެ 136 ރަށެއްގެ ހޮސްޕިޓަލް ނުވަތަ ސިއްހީ މަރުކަޒު އަޕްގްރޭޑްކުރުމަށްވެސް 2023 ވަނަ އަހަރުގެ ބަޖެޓުގައި ހިމަނާފައިވާކަމަށް މިނިސްޓަރު ވިދާޅުވިއެވެ. އޭގެ ތެރޭގައި ސިއްހީ ދާއިރާއަށް ބޭނުންވާ އުމްރާނީ ތަރައްގީ ގެނައުމާއި، ވަސީލަތްތައް މުއްސަނދިކޮށް ޚިދުމަތްތައް ފުޅާކުރުމުގެ އިތުރުން ފެންވަރު ރަނގަޅުކުރުން ހިމަނާފައިވާކަމަށް މިނިސްޓަރު ވިދާޅުވިއެވެ. 

މިނިސްޓަރު ވިދާޅުވީ ނަފްސާނީ ބަލިމަޑުކަން ހުންނަ ފަރާތްތަކަށް ޚާއްސަ ސެންޓަރުތައް ރާއްޖޭގެ އެކި ސަރަހައްދުތަކުގައި ހުޅުމުގެ މަސައްކަތްވެސް އަންނަ އަހަރުގެ ބަޖެޓުގައި ހިމަނާފައިވާކަމަށެވެ. 

ސިއްހީ ދާއިރާއަށް ގެނެވޭ އެންމެ މުހިންމު ތަރައްގީއަކީ ސިއްހީ ދާއިރާގައި މަސައްކަތް ކުރާ މީހުންގެ މުސާރައަށް ގެނެވޭ ހެޔޮ ބަދަލުކަމަށް ބަޖެޓު ހުށައަޅުއްވާދެއްވަމުން މިނިސްޓަރު ވިދާޅުވިއެވެ. 

އެގޮތުން މުސާރަތައް ދެން އެންމެ އަވަހަށް އެއްހަމަ ކުރެވިގެންދާނީ ސިއްހީ ޚިދުމަތްތެރިންނަށް ކަމަށް މިނިސްޓަރު ވަނީ ވިދާޅުވެފައެވެ. 

މިނިސްޓަރު އިތުރަށް ވިދާޅުވީ އަތޮޅުތެރޭގައި ހުރި 24 ގަޑިއިރު ޚިދުމަތްދޭ ސިއްހީ މަރުކަޒުތަކަށްވެސް އަންނަ އަހަރުގެ ބަޖެޓުގައި އިތުރުކޮށްދީފައިވާކަމަށެވެ. 

އޭގެ އިތުރުން ސިއްހީ ޚިދުމަތްތެރިންގެ އަދަދު އިތުރުކުރުމަށް 40.1 މިލިއަން ރުފިޔާ ހިމަނާފައި ވާނެކަމަށް މިނިސްޓަރު ވިދާޅުވިއެވެ. 

އެކަންކަން ފާހަގަކުރައްވާ މިނިސްޓަރު ވިދާޅުވީ ސަރުކާރުގެ ވިސްނުމަކީ އިގްތިސާދު ތަންދޭ މިންވަރަކުން ސިއްހީ ދާއިރާއަށް ކުރާ ހޭދަ އިތުރުކުރަމުން ދިއުންކަމަށެވެ. އަދި ސިއްހީ ދާއިރާއަށް އަންނަ ތަރައްގީއަކީ ރައްޔިތުންގެ ދިރިއުޅުމާއި ދުޅަހެޔޮކަމާއި ގުޅިފައިވާ ކަމެއްކަން މިނިސްޓަރު ފާހަގަކުރެއްވިއެވެ.