Advertisement

2023 އަށް ހުށައެޅި ބަޖެޓު: ތައުލީމީ ދާއިރާއަށް 4.6 ބިލިއަން ރުފިޔާ ކަނޑައަޅައިފި

31 Oct 2022 | 11:37
އެޑިއުކޭޝަން މިނިސްޓަރު އައިޝަތު އަލީ މަޖިލީހުގައި/ ފޮޓޯ: މަޖިލިސް

އަންނަ އަހަރަށް ލަފާކޮށް ސަރުކާރުން ހުށައެޅި ބަޖެޓުގައި ތައުލީމާއި މަތީ ތައުލީމަށް ކުރާ ޚަރަދުގެ ގޮތުގައި 4.6 ބިލިއަން ރުފިޔާ ހިމަނައިފިއެވެ. 

2023 އަށް ލަފާކުރާ ސަރުކާރުގެ ބަޖެޓު މިއަދު ފިނޭންސް މިނިސްޓަރު އިބްރާހިމް އަމީރު ވަނީ މަޖިލީހަށް ހުށައަޅުއްވާފައެވެ. 

ބަޖެޓު ހުށައަޅުއްވާދެއްވަމުން މިނިސްޓަރު ވިދާޅުވީ ތޫނުފިލި އުފެއްދުންތެރި ޖީލެއް ބިނާކުރުމަކީ މި ސަރުކާރުން ކުރާ އެންމެ ބޮޑު އިންވެސްޓުމަންޓު ކަމަށެވެ. އަދި ސަރުކާރުގެ ދިގު ރާސްތާގެ އަމާޒަކީ އަމިއްލަ ފަސްގަނޑުގައި ތިބެގެން ފެންވަރު ރަނގަޅު ތައުލީމެއް ހޯދޭނެ މަގު ކޮންމެ ދަރިވަރަކަށްވެސް ފަހިކޮށްދިނުން ކަމަށް މިނިސްޓަރު ވިދާޅުވިއެވެ. 

Advertisement

އެއާއެކު މިނިސްޓަރު ވިދާޅުވީ ތައުލީމާއި މަތީ ތައުލީމަށް ދެވޭ އެންމެ ބޮޑު ޖާގަ ކަނޑައަޅާފައިވަނީ ކުރިއަށް އޮތް އަހަރުގެ ބަޖެޓުގައި ކަމަށެވެ. އެގޮތުން މަތީ ތައުލީމަށް ބަޖެޓުން 4.6 ބިލިއަން ރުފިޔާ ކަނޑައަޅާފައިވާނެކަމަށް މިނިސްޓަރު ވިދާޅުވިއެވެ. 

ފިނޭންސް މިނިސްޓަރު އަމީރު ބަޖެޓު ހުށައަޅުއްވާދެއްވަނީ 

"ތައުލީމާއި މަތީ ތައުލީމަށް މިހާތަނަށް ދެވޭ އެންމެ ބޮޑު ޖާގަ ކަނޑައަޅާފައިވާނީ މި ބަޖެޓުގައި. އެގޮތުން 4.6 ބިލިއަން ރުފިޔާ މި ދާއިރާއަށް ކަނޑައެޅިފައިވާނެ"

ފިނޭންސް މިނިސްޓަރު އަމީރު 

އެ ބަޖެޓުގެ ތެރޭގައި ތައުލީމީ ދާއިރާގެ މުސާރަ އެއްހަމަ ކުރުމުގެ ސަބަބުން އިތުރުވި 636.2 މިލިއަން ރުފިޔާ ހިމެނޭކަން މިނިސްޓަރު ފާހަގަކުރެއްވިއެވެ. 

ޓީޗަރުންގެ މުސާރައަށް ގެނެވުނު ހެޔޮ ބަދަލު ތައުލީމީ ދާއިރާއިން ފެންނަމުން ދާ ކަމަށާއި، އެ ކަމުގެ ސަބަބުން ތައުލީމީ ދާއިރާގެ ފެންވަރު އެތައް ގުނައެއް ރަނގަޅުވެގެން ގޮސްފައިވާކަމަށް ފިނޭންސް މިނިސްޓަރު ވަނީ ވިދާޅުވެފައެވެ. 

ސުކޫލުތައް އަޕްގްރޭޑް ކުރުމަށް ގިނަ މަޝްރޫއުތައް ހިމަނައިފި!

ބަޖެޓު ހުށައަޅާދެއްވަމުން މިނިސްޓަރު ވިދާޅުވީ ތައުލީމީ ދާއިރާގެ އިމާރާތާއި ވަސީލަތްތައް ގާއިމްކުރުމަށް 142 ރަށެއްގައި 195 މަޝްރޫއެއް 2023 ވަނަ އަހަރު ހިންގުމަށް ވަނީ ހަމަޖެހިފައިކަމަށެވެ. 

އޭގެތެރޭގައި 21 ރަށެއްގެ ސުކޫލު އިމާރާތާއި ވަސީލަތްތައް ތަރައްގީކުރުމުގެ އާ މަޝްރޫއުތައް ހިމެނޭކަމަށް މިނިސްޓަރު ވިދާޅުވިއެވެ. 

"އަލަށް އާބާދުވާ ސަރަހައްދުތަކުގައި މުޅިން އާ ސުކޫލުތައް އެޅުމަށް ހިމެނޭ. ހުޅުމާލޭ ފޭސް 2 ގައި ގާއިމްކުރެވުނު ވަގުތީ ސުކޫލުގެ ބަދަލުގައި އަންނަ އަހަރު ދާއިމީ ސުކޫލުތައް ގާއިމްކުރެވިގެންދާނެ." 

ފިނޭންސް މިނިސްޓަރު އަމީރު 

ހުޅުމާލޭގައި އިމާރާތް ކުރި ވަގުތީ ސުކޫލު 

ތައުލީމީ ދާއިރާއަށް ކުރަން ނިންމަވާފައިވާ ބައެއް މުހިންމު ޚަރަދުތަކުގެ ތަފްސީލުތައް ހާމަކޮށްދެއްވަމުން މިނިސްޓަރު ވިދާޅުވީ އަންނަ އަހަރުގެ ބަޖެޓުގައި ހިލޭ ޑިގްރީގެ ޕްރޮގްރާމަށް 166.7 މިލިއަން ރުފިޔާ ހިމަނާފައިވާކަމަށެވެ. 

އޭގެ އިތުރުން މަތީ ތައުލީމު ހާސިލްކުރުމަށް ކުދިންނާއި މައިންބަފައިން ކުރަން ޖެހޭ ހޭދަ ކުޑަކުރުމަށް ކުޑަ އިންޓްރެސްޓް ރޭޓުގައި ހުޅުވާލާފައިވާ ލޯނު ސްކީމް އަންނަ އަހަރުވެސް ކުރިއަށް ދާނެކަމަށް މިނިސްޓަރު ވަނީ ވިދާޅުވެފައެވެ. އަދި އެކަމަށް 216.1 މިލިއަން ރުފިޔާ ކަނޑައަޅާފައިވާކަމަށް މިނިސްޓަރު ވިދާޅުވިއެވެ. އޭގެ އިތުރުން މަތީ ތައުލީމަށް ޚާއްސަކޮށް 856.6 މިލިއަން ުރިފޔާ ބަޖެޓުގައި ހިމަނާފައިވާނެކަން މިނިސްޓަރު ފާހަގަކުރެއްވިއެވެ. 

މިނިސްޓަރު ވިދާޅުވީ އެފަދައިން ބޮޑު ބަޖެޓެއް އެކަމަށް ޚާއްސަކޮށްފައިވަނީ މަތީ ތައުލީމު ހޯދުމަށް ދިވެހި ޒުވާނުންނަށް ހުރި ހުރަސްތައް ނައްތާލާ އެމީހުންގެ ދިރިއުޅުން އަމިއްލައަށް ބައްޓަން ކުރާ ގަދަރުވެރި ބަޔަކަށް ހެދުމަށް ސަރުކާރުން ގެންގުޅޭ ވިސްނުމުގެ ތެރެއިންކަމަށެވެ. 

Advertisement

ކޮމެންޓް

Advertisement

Advertisement