އދ. ގެ ޖެނެރަލް އެސެމްބްލީގައި ރާއްޖެއިން މޮރިޝަސްއާ އެއްކޮޅަށް ވޯޓްލާނޭކަން އަންގަވައި ރައީސް އިބްރާހިމް މުހައްމަދު ސޯލިހް، މޮރިޝަސްގެ ބޮޑުވަޒީރަށް ފޮނުއްވެވި ސިޓީފުޅު ރައްޔިތުންގެ މަޖިލީހުގެ ކަމާގުޅޭ ކޮމެޓީއަށް ގެންނަވައި އެ މައްސަލަ ބަލައި ދިނުމަށް ރައްޔިތުންގެ މަހިބަދޫ ދާއިރާގެ މެންބަރު އަހުމަދު ތޯރިގް (ޓޮމް) އެދިލައްވައިފިއެވެ. 

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް، ޓޮމް ފޮނުއްވެވި ސިޓީގައި ވިދާޅުވީ، ރާއްޖޭގެ ހާއްސަ އިގްތިސޯދީ ކަނޑުގެ ސަރަހައްދާއި ޗާގޯސް ކަނޑުގެ ސަރަހައްދާއި ފުށުއެރުންތަކެއް ހުރި ކަަމަށް ބުނެ ބައިނަލްއަގްވާމީ ޓްރައިބިއުނަލްގައި މޮރިޝަސް އިން ރާއްޖެއާ ދެކޮޅަށް ހުށައަޅައި ކުރިއަށް ދަނިކޮށް މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާ ކަމަށް ރާއްޖެއިން ގަބޫލުކޮށް އޮގަސްޓް 22، 2022 ގައި މޮރިޝަސްގެ ބޮޑުވަޒީރަށް ރައީސް ސޯލިހު ސިޓީފުޅެއް ފޮނުއްވާފައިވާ ކަމަށް ބަންޑާރަ ނާއިބު އިބްރާހިމް ރިފްއަތު، އޮކްޓޫބަރު 20، 2022 ގައި ބައިނަލްއަގްވާމީ ޓްރައިބިއުނަލްގައި ވިދާޅުވެފައިވާ ކަމަށެވެ.

އަދި މޮރިޝަސް އިން ޗާގޯސްގެ މައްޗަށް ސިޔާދަތީ ބާރު ލިބިގެންވާ ކަަމަށް ދައުވާ ކުރާ މައްސަލާގައި ޒަމާނުއްސުރެ ރާއްޖެއިން އަމަލު ކުރަމުން އަދި ދަމަހައްޓަމުން އަންނަ ރާއްޖޭގެ އެންމެ މަތީ މަސްލަހަތު ހިމާޔަތް ކުރުމުގެ ސިޔާސަތު ބަދަލު ކުރުމުގެ ސަބަބުން ރާއްޖޭގެ ހާއްސަ އިގްތިސޯދީ ސަރަހައްދުން ބައެއް އުނިވެދާނެ ކަމަށްވެސް ޠާރިގުގެ ސިޓީގައި ފާހަގަކުރައްވާފައިވެއެވެ. 

އެހެންކަމުން ރައީސް ޞާލިހު، މޮރިޝަސްގެ ބޮޑުވަޒީރަށް ފޮނުއްވާފައިވާ ސިޓީފުޅަކީ ގާނޫނު އަސާސީގެ ތިންވަނަ މާއްދާ އިން ކަނޑައަޅާފައިވާ ރާއްޖޭގެ ސަރަހައްދަށް ބަދަލު އަންނާނެ ހާލަތެއް މެދުވެރިވާނެ ކަމަކަށް ވާތީ އެ ސިޓީފުޅު ރައްޔިތުންގެ މަޖިލީހުގެ ކަމާގުޅޭ ކޮމެޓީއަށް ގެންނަވައި އެ މައްސަލަ ބަލައި ދިނުމަށް ޓޮމްގެ ސިޓީގައި ވަނީ އެދިލައްވާފައެވެ. 

ޗާގޯސް އާއި ރާއްޖޭގެ އިން ވަކިކުރުމުގެ މައްސަލައިގައި 2019 ވަނަ އަހަރު މި ސަރުކާރުން ވޯޓް ދިނީ މޮރިޝަސްއާ ދެކޮޅަށް އިނގިރޭސިވިލާތާއި އެއްކޮޅަށެވެ. އެހެން ނަމަވެސް، ޗާގޯސް ރަށްތަކުގެ ސިޔާދަތީ ބާރުވެރިކަން މޮރިޝަސްއަށް އޮތް ކަމަށް އެއްބަސްވެ މިދިޔަ އޮގަސްޓު މަހު ރައީސް ސޯލިހް މޮރިޝަސްގެ ރައީސްއަށް ސިޓީއެއް ވަނީ ފޮނުވާފައެވެ. ނަމަވެސް އެކަން ސަރުކާރުން ހާމަކުރީ އިން ވަކިކުރުމުގެ މައްސަލައިގެ ޝަރީއަތުގައި މީގެ ދެހަފްތާ ކުރިންނެވެ. ސަރުކާރުގެ މި ކުއްލި ނިންމުމާއި ގުޅިގެން ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފައެވެ.