ރާއްޖޭގައި ނަފްސާނީ ބަލިތަކަށް މިވަރުގެ ސަމާލުކަމެއް ލިބެންފެށީ އަދި ކިރިޔާ ކަމަށް ހެލްތު މިނިސްޓަރ އަހްމަދު ނަސީމް ވިދާޅުވެއްޖެ އެވެ.
ނަސީމް މިހެން ވިދާޅުވީ މިހާރު ކުރިއަށްދާ ރައްޔިތުންގެ މަޖިލީހުގެ ތިންވަނަ ދައުރުގެ 32 ވަނަ ޖަލްސާގައި، މާފަންނު މެދު ދާއިރާގެ މެމްބަރު އިބްރާހިމަ ރަޝީދު (ބޮންޑެ) މެންޓަލް ހެލްތު އެކްޓް އާއި ގުޅިގެން ކުރެއްވި ސުވާލަށް ޖަވާބު ދެއްވަމުން ނެވެ.
އެގޮތުން ބޮންޑެ ވަނީ ދިވެހިރާއްޖޭގެ ނަފްސާނީ ހާލަތު ވަރަށް ބޮޑު ކަން ފާހަގަކުރައްވައި ގުރައިދޫ މަރުކަޒުގެ ހާލަތު ވެސް އަދިވެސް ވަރަށް ދަށް ކަމަށް ވިދާޅުވެފައެވެ. އެހެންކަމުން، މެންޓަލް ހެލްތު އެކްޓާއި، އުމުރުން ދުވަސްވީ ފަރާތްތަށް ބެހެއްޓުމަށް ދުނިޔޭގެ އެކި ގައުމުތަކުގައި ހަދާފައި ހުންނަ ގޮތަށް ޑޭކެއަރ ސެންޓަރުތައް ހެދޭނީ ކޮންއިރަކުތޯ ސުވާލުކުރައްވާފައެވެ.
ބޮންޑެ ގެ ސުވާލަށް ޖަވާބު ދެއްވަމުން ނަސީމް ވިދާޅުވީ ނަފްސާނީ ބަލިތައް މިހާރު ވަރަށް ގިނަ ވެފައިވާ ކަމަށާ، އެކަމާއި ގުޅޭ މަސައްކަތް ކުރުމަށް ހެލްތު މިނިސްޓްރީގައި ވަކި ޑިޕާޓްމަންޓެއް ހަދައިގެން މަސައްކަތް ކުރައްވަމުންދާ ކަމަށެވެ.
މިއާއެކު ނަސީމް ވިދާޅުވީ ނަފްސާނީ ބަލިތަކަކީ ދިރިއުޅުމާއި އުޅޭ މާހައުލާއި ވަރަށް ބޮޑަށް ގުޅިފައިވާކަމެއް ކަމަށާއި ނަފްސާނީ ބަލިތައް އިތުރުވެގެންދިޔައީ ލޮކްޑައުންގެ ތެރޭގައި ކަމަށެވެ.
"އަދި ކިރިޔާ މީގެ ބޮޑު ފޯކަސް އަކަށް އާދެވިގެން މިއުޅެނީ. ނަފްސާނީ ބައްޔަކީ މުޅި ސަރުކާރުގެ ހުރިހާ މުއައްސަސާ ތަކަކާ، މުޅި އާއްމު ރައްޔިތުންގެ ވަރަށް ބޮޑު ހޭލުންތެރިކަމެއް އައިސްގެން ނޫނީ އަޅުގަނޑަށް ކުރިއަށް ނުގެންދެވޭނެ ކަމެއް. ހަމައެކަނި ހެލްތު މިނިސްޓްރީ އަކުން އަޅުގަނޑުމެންނަށް ނަފްސާނީ ބަލިތަކަށް ޚިދުމަތް ނުދެވޭނެ އިނގޭތޯ." މިނިސްޓަރު ނަސީމް ވިދާޅުވިއެވެ.
ނަސީމް ވިދާޅުވީ ނަފްސާނީ ބައްޔަށް ހައްލެއް ހޯދުމަކީ، ހަމައެކަނި ހެލްްތު މިނިސްޓްރީއަށް ކުރެވޭނޭ ކަމެއް ނޫން ކަމަށާއި މިކަމުގައި މުޅި މުޖުތަމައުގެ އެއްބާރުލުމާއި އެހީތެރިކަން ބޭނުންވާކަމަށެވެ. އަދި ނަފްސާނީ ބަލިތަކަކީ ހީކުރާ ވަރަށްވުރެ މާ ސީރިއަސް މައްސަލައެއް ކަމަށާ، އެކަމަށްޓަކައި ވަކި ޑިޕާޓްމަންޓެއް ވެސް ހަދާފައިވަނީ އޭގެ ސަބަބުން ކަމަށް އޭނާ ވިދާޅުވި އެވެ.
ސަރުކާރުގެ ހޮސްޕިޓަލެއްގައި ފުރަތަމަ ފަހަރަށް ނަފްސާނީ ފަރުވާ ދިނުމަށް ޑިޕާޓްމަންޓެއް ގާއިމްކުރީ މިސަރުކާރުން 2019 ވަނަ އަހަރު އެވެ. އެއަށްފަހު މިއަހަރު ތެރޭގައި ހުޅުމާލެ ހޮސްޕިޓަލުގައި ވެސް މެންޓަލް ހެލްތު ޑިޕާޓްމަންޓެއް ވަނީ ގާއިމްކޮށްފަ އެވެ.
Advertisement
This content is created and paid for by advertisers and does not involve Voice Journalists
