ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކޮޕް 27 ގައި ބައިވެރިވެވަޑައިގަތުމަށް މިސްރަށް ކުރައްވަމުންދާ ދަތުރުފުޅަށް ރައްޔިތުންގެ މަޖިލީހުން ޚަރަދެއް ނުކުރެއޭ ބުނުމަކުން އެކަމާއި ގުޅިގެން އުފެދޭ އެހެން މައްސަލަތައް ހައްލު ނުވާނެ ކަމަށް މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މިފަދައިން ވިދާޅުވީ، މިޞްރުގެ ޝަރްމުއްޝައިޚްގައި މިހާރު ކުރިއަށްދާ އ.ދ.ގެ 2022 ވަނަ އަހަރުގެ ކުލައިމެޓް ޗޭންޖް ކޮންފަރެންސް ( ކޮޕް 27) ގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު، އަވަށްްޓެރި ސްރީލަންކާ ތަމްސީލް ކުރައްވާތީ ގިނަ ބައެއްގެ ފާޑުކިޔުންތައް އެކަމަށް އަމާޒުވެފައި ވަނިކޮށް، އެމަނިކުފާނުގެ އެ ދަތުރުފުޅަށް ރައްޔިތުންގެ މަޖިލީހުން ޚަރަދު ނުކުރައްވާ ކަމަށް މަޖިލީހުގެ އިދާރާއިން ބުނުމާއި ގުޅިގެންނެވެ.
ރޮޒައިނާ ކުރެއްވި ޓްވީޓެއްގައި ވަނީ ރާއްޖޭގެ ރައްޔިތުންގެ މަޖިލީހުގެ ރައީސް އަށް، ރާއްޖެ ބައިވެރިވާ ފޯރަމެއްގައި އަމުދުން އެހެން ޤައުމެއް ތަމްސީލު ކުރެއްވިދާނެތޯ ބަންޑާރަ ނައިބު އިބްރާހިމް ރިފްއަތު އާ ސުވާލެއް ކުރައްވާފައެވެ. އަދި އެކަން އެގޮތަށް ކުރެވޭނެ ކަމަށް އޭނާގެ ބުއްދި އަށް ގަބޫލު ނުކުރެވޭ ކަމަށް ވެސް ރޮޒައިނާ ވިދާޅުވިއެވެ.
މީގެ އިތުރުން ރޮޒައިނާ ވިދާޅުވީ، ރައީސް ނަޝީދު ގެ އެ ދަތުރުފުޅަށް މަޖިލީހުން އެއްވެސް ޚަރަދެއް ނުކުރާކަމަށް ބުނުމަކުން ހައްލެއް ނެތް ކަމަށެވެ.
"އިރުކޮޅަކުން އަޅުގަނޑުމެންގެ ރައީސުލްޖުމްހޫރިއްޔާވެސް ވަޑައިގަންނަވަންވީ ދެއްތޯ ޔޫއެން އަށް ސްރީލަންކާ ތަމްސީލު ކުރަން. ދެން ރައީސް އޮފީހުން ޚަރަދު ނުކުރަމޭ ބުނީމަ ނިމުނީ؟ މީ ކޮންކަހަލަ ކަމެއް؟" އޭނާ ވަނީ ސުވާލު އުފައްދަވައިފައިވެއެވެ.
ރޮޒައިނާގެ އިތުރުން މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވެސް ވަނީ ރައީސް ނަޝީދު ލަންކާ ތަމްސީލު ކުރެއްވުމަކީ ގާނޫނު އަސާސީ އާއި ޚިލާފް ކަމެއް ކަމުގައި ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
