މީ ޓީ.ޖީ.އެސް.ޓީ ބޮޑު ކުރަންވީ ވަގުތު ނޫން ކަމަށާއި ޓެކްސް ބޮޑުކުރަން ދުނިޔޭގެ އިގްތިސާދު ތަން ނުދޭކަމަށް މަރުކަޒީ ބޭންކުން ބުނެފިއެވެ. 

އަންނަ އަހަރަށް ހުށަހަޅާފައިވާ ބަޖެޓާ ގުޅޭ ގޮތުން އެމްއެމްއޭގެ ފަންނީ ލަފާ މިއަދު ބަޖެޓް ކޮމިޓީއަށް ހުށައަޅުއްވާފައިވާއިރު އެމްއެމްއޭގެ ގަވަރުނަރު އަލީ ހާޝިމް ވިދާޅުވީ ޓެކްސް ބޮޑުކުރުމަކީ އޭގެ ޒާތުގައި ގޯސްކަމެއްކަމަށް ދެކިވަޑައި ނުގަންނަވާކަމަށެވެ. އަދި އެއީ ކުރަންޖެހޭ ކަމެއްކަންވެސް ފާހަގަކުރެއްވިއެވެ. 

އެހެން ނަމަވެސް އޭނާ ވިދާޅުވީ މިހާރު ދުނިޔޭގެ އިގްތިސާދު އޮތް ގޮތަށް ރިއާޔަތް ކުރާއިރު، އަންނަ އަހަރަކީ ޓެކްސް ބޮޑުކުރުމަށް މުނާސަބު ވަގުތު ނޫންކަމަށެވެ. 

Advertisement

އެމްއެމްއޭއިން އެފަދައިން ބުނާ ސަބަބު ތަފްސީލުކޮށްދެއްވަމުން ހާށިމް ވިދާޅުވީ ދުނިޔޭގެ އިގްތިސާދު އަދިވެސް އޮތީ ވަރަސް ނާޒުކު ފައްތަރެއްގައިކަމަށެވެ. އެގޮތުން ރަޝިޔާ-ޔޫކުރެއިން ހަނގުރާމަ ދެމިގެން ދިއުމުގެ ފުރުސަތު ބޮޑުކަމަށާއި، އޭގެ އަސަރު ތެލުގެ ބާޒާރަށް ކުރާނެކަމަށް އޭނާ ވިދާޅުވިއެވެ. އެއާއެކު ދިވެހިރާއްޖެއަށް ތެޔޮ ގަންނަން ކުރަން ޖެހޭ ޚަރަދުތައްވެސް ބޮޑުވެގެންދާނެކަމަށް ހާޝިމް ވިދާޅުވިއެވެ. 

ހާޝިމް ވިދާޅުވީ ދިވެހިރާއްޖެއަށް ގިނަ އަދަދަކަށް ފަތުރުވެރިން ޒިޔާރަތްކުރަމުން ދިޔަ ޗައިނާއިން އަދިވެސް ޒީރޯ ކޮވިޑު ޕޮލިސީ ދަމަހައްޓާނެކަން އިއުލާންކޮށްފައިވާއިރު އެކަމުގެ ސަބަބުން ޗައިނާ ފަތުރުވެރިން ރާއްޖެ އަންނަތަން ނުފެންނަކަމަށެވެ. ޗައިނާއަކީ ރާއްޖޭގެ ފަތުރުވެރިކަމުގެ ސިނާއަތަށް ބޭރު ފައިސާވައްދާ މުހިންމު ގައުމަކަށް ވާއިރު، ޗައިނާއިން އަންނަ ފަތުރުވެރިންގެ އަދަދު ލިމިޓުވެގެން ދިއުމަކީވެސް ސަބަބެއްގެ ގޮތުގައި ފާހަގަކުރެއްވިއެވެ. 

އެކަން އެހެން އޮތުމުން ދުނިޔޭގެ އިގްތިސާދު ނާޒުކު ފައްތަރެއްގައި އޮއްވާ ޓީޖީއެސްޓީ ބޮޑުކުރުމަކީ މުނާސަބު ކަމެއް ނޫންކަމަށް ގަވަރުނަރު ވަނީ ތަކުރާރުކޮށް ވިދާޅުވެފައެވެ. 

ޓެކްސް ބޮޑުކުރުމާއި ގުޅޭގޮތުން އެމްއެމްއޭއިން ހުށައަޅާފައިވާ ފަންނީ ލަފާގައިވެސް ޓެކްސް ބޮޑުނުކުރުމަށް ވަނީ ލަފާދީފައެވެ. އަދި ޓެކްސް ބޮޑުކޮށްފިކަމަށް ވާނަމަ އަންނަ އަހަރު ތަކެތީގެ އަގުތައް ވަރަށް ބޮޑަށް އުފުލިގެންދާނެކަންވެސް އެމްއެމްއޭއިން ވަނީ ފާހަގަކޮށްފައެވެ.