ސައްހަނޫން ޑޮލަރު ބޭނުންކޮށްގެން މަކަރާއި، ހީލަތުން މޯބައިލް ފޯނެއް ގަންނަން އުޅުނު މީހަކު ފުލުހުން ހައްޔަރުކޮށްފިއެވެ.
ފުލުހުން ބުނީ، ސައްހަނޫން ޑޮލަރު ބޭނުންކޮށްގެން މަކަރާއި، ހީލަތުން މޯބައިލް ފޯނެއް ގަންނަން އުޅުނު މައްސަލައާ ގުޅިގެން އުމުރުން 21 އަހަރުގެ ދިވެހި ފިރިހެނަކު ރޭގެ ވަގުތެއްގައި މާލެއިން ހައްޔަރުކޮށްފައިވާކަމަށެވެ.
އަދި މި މައްސަލައާ ގުޅިގެން އޭނާގެ ބަންދަށް 15 ދުވަހުގެ މުއްދަތު ކޯޓުން މިއަދު ވަނީ ދީފައިވާ ކަމަށާ މި މައްސަލަ ފުލުހުން އިތުރަށް ތަޙްޤީޤްކުރަމުންދާ ކަމަށް ފުލުހުން ބުނެފައިވެއެވެ.
މިފަހަކަށް އައިސް ސައްހަނޫން ޑޮލަރާއި ފައިސާ އަދި ސްލިޕްތައް ބޭނުންކޮށްގެން ވިޔަފާރިކުރުމާއި، ބޭންކްގެ ނަމުގައި ތަފާތު ކޯލްތައް ކޮށްގެން މަކަރާއި، ހީލަތުން ފައިސާ ހޯދުން ރާއްޖޭގައި އަންނަނީ އިތުރުވަމުންނެވެ. އެގޮތުން އެކި ހާދިސާ ތަކާއި ގުޅިގެންވެސް އެފަދަ ކޯލް ތަކާއި މެސެޖުތައް އައުން އިތުރު ވެފައިވާއިރު އެފަދަ ކަންކަމަށް ސަމާލުވުމަށް ފުލުހުން ތަކުރާރުކޮށް އަންނަނީ އިލްތިމާސް ކުރަމުންނެވެ.
Advertisement
This content is created and paid for by advertisers and does not involve Voice Journalists
