ކުރީގެ ރައީސް ރައީސް ޔާމީން އަބްދުލްގައްޔޫމް ގެ ވެރިކަމުގައި، މިހާރުގެ އިދިކޮޅު ޕީޕީއެމަށް މަޖިލީހުގެ މެޖޯރިޓީ ލިބިފައި ވީއިރު، މަޖިލީހަށް ފޮނުވާ ބިލުތައް ސަރުކާރުން ފޮނުވާ ގޮތަށް ”ރަބަރު ތައްގަނޑަށް“ ޖަހާފައި ފާސްކުރި ކަމަށް ބުނެ ފާޑުވިދާޅުވި ބޭފުޅުން، މިހާރު އެ ނުކުންނެވީ މުލިއާގެ އިން ކަމަށް ވިދާޅުވެ، މާލެ ސިޓީ ކައުންސިލްގެ ހުޅުމާލޭ ދާއިރާގެ މެންބަރު އަދި ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެންބަރު އިބްރާހީމް ޝުޖާއު ރައްޔިތުންގެ މަޖިލީހުގެ އެމްޑީޕީ ބައެއް މެންބަރުންނަށް ފާޑުވިދާޅުވެއްޖެއެވެ. 

ޝުޖާއު މިފަދައިން ވިދާޅުވެ ފާޑުވިދާޅުވެފައި މިވަނީ، ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ޢަމަލު ކުރައްވަމުން ގެންދަވާ ގޮތާއި މެދު ނުރުހުން ފާޅުކޮށް އެކަމުގެ ޝަކުވާ އާއި އެކު، ރައްޔިތުންގެ މަޖިލީހުގެ އެމްޑީޕީ ބައެއް މެންބަރުން ރައީސުލްޖުމްހޫރިއްޔާ އަދި އެމްޑީޕީގެ އިސް ލީޑަރު އިބްރާހިމް މުހައްމަދު ޞާލިހްއާއި ބައްދަލު ކުރައްވަން މުލިއާގެއަށް އިއްޔެ ވަޑައިގެންނެވުމާއި ގުޅިގެންނެވެ. 

އެގޮތުން ޝުޖާއު ކުރެއްވި ޓުވީޓެއްގައި ވިދާޅުވީ ޕީޕީއެމަށް ”ރަބަރު ތައްގަނޑަށް“ ގޮވި މީހުންނަށް ތަރައްގީއަށް ކަމެއް ނުކުރެވޭ ތަނުގައި "ފެލަނީ" ރައްޔިތުން ކަމަށެވެ. 

Advertisement

"އަހަރެމެން ރަބަރު ތައްގަނޑުވެގެން އޮންނާނެ ބުރިޖަކާ، 25 ބުރީގެ ހޮސްޕިޓަލަކާ، މާސިންގާ އެއަރޕޯޓަކާ، 14 ހާހަށްވުރެ ގިނަ ފުލެޓާ، 104 ހާސް ވަޒީފާ އުފައްދާފަ. މި ރަބަރު ތައްގަނޑުތައް ފެލަނީ ރައްޔިތުން." ޝުޖާއު ވިދާޅުވިއެވެ. 

ރައްޔިތުންގެ މަޖިލީހުގެ އެމްޑީޕީގެ ރައީސް ޞާލިހުގެ ފެކްޝަނުގައި ހިމެނޭ 26 މެމްބަރުން އެމަނިކުފާނާއި އެކު ބޭއްވެވި ބައްދަލުވުމުގައި ވަނީ ކުރިއަށް އޮތް 2023 ވަނަ އަހަރަށް ސަރުކާރުން ހުށަހަޅާފައިވާ ބަޖެޓާއި، އަދި ޖީއެސްޓީއާއި ޓީޖީއެސްޓީ ބޮޑު ކުރުމަށް މަޖިލީހަށް ހުށަހަޅާފައިވާ ބިލަށް ވޯޓަށް އެހުމުގެ ކަންކަން ރައީސް ނަޝީދު ލަސްކުރައްވަމުން ގެންދަވާތީ އެކަމާއި ކަންބޮޑުވުން ފާޅުކޮށް، ރައީސް ނަޝީދުގެ އިތުބާރު ނެތް ކަމުގެ ވޯޓު ނެންގެވުމާއި މެދު މަޝްވަރާ ކުރައްވާފައެވެ.

ތިން ބާރު ވަކިކުރެވިފައިވާ ވެރިކަން ކުރުމުގެ ނިޒާމެއްގައި މިފަދަ ކަމެއް ވެރިކަން ކުރާ އެމްޑީޕީގެ މެންބަރުންގެ ކިބައިން ފެނުމާއި ގުޅިގެން އެޕާޓީގެ މެންބަރުންނާއި އިދިކޮޅު މެންބަރުންވެސް އަންނަނީ އެކަމަށް ވަރަށް ބޮޑަށް ފާޑުވިދާޅުވަމުންނެވެ.