19 ވަނަ ރައްޔިތުންގެ މަޖިލީހުގެ ބައެއް މެމްބަރުން ކޮންޓްރޯލުކުރަމުންދަނީ ރައީސް އޮފީހުންކަމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
އަލީ އާޒިމް މިފަދައިން ވިދާޅުވެފައިވަނީ ރައްޔިތުންގެ މަޖިލީހަށް ހުށައަޅާފައިވާ ގަރާރަކަށް ވާހަކަދައްކަވަމުންނެވެ. އޭނާ ވިދާޅުވީ ތިން ބާރު ވަކިވެފައިވާ ވެރިކަމުގެ ނިޒާމެއްގައި ރައްޔިތުންގެ މަޖިލީހުގެ މެމްބަރުންނަށް ނުފޫޒު ފޯރުވާ ރައީސް އޮފީހުން ކޮންޓްރޯލު ކުރުމަކީ ހިތާމަކުރާކަމެއްކަމަށެވެ.
ރައްޔިތުންގެ މަޖިލީހުގައި ސަރުކާރުގެ މެމްބަރުން ތިއްބަވާކަމަށާއި، އެފަދަ މެމްބަރުންގެ ސިފަތައްވެސް އާޒިމް ވަނީ ވިދާޅުވެދެއްވާފައެވެ.
"ސަރުކާރު މެމްބަރެއްގެ ފުރަތަމަ ޝަރުތަކީ އެމީހަކަށް އެމީހެއްގެ ދަރިއަކަށް، އަތްބަކަށް، ފިރިއަކަށް ނޫނީ ތިމާގެ މީހަކަށް ސިޔާސީ ކޮންމެސް ބޮޑު ވަޒީފާއެއް ލިބިފައި އޮންނަން ޖެހޭނެ. ދެވަނަ ޝަރުތަކީ އެމީހަކަށް، އެމީހެއްގެ އަތްބަކަށް، ފިރިއަކަށް، ދަރިއަކަށް ނުވަތަ ގާތްތިމާގެ މީހަކަށް ކޮންމެސް ރަނގަޅު ޕްރޮޖެކްޓެއް ސަރުކާރުން ލިބިފައި އޮންނަން ޖެހޭނެ. ތިންވަނަ ޝަރުތަކީ އެމީހަކަށް، އެމީހެއްގެ އަތްބަކަށް، ފިރިއަކަށް. ދަރިއަކަށް، އެމީހެއްގެ ގާތްތިމާގެ ކޮންމެވެސް މީހެއްގެ މައްސަލަ ޝަރީއަތުގައި ނޫނީ ފުލުސް އޮފީހުގައި ކޮންމެވެސް ތަނެއްގައި ތަހުގީގުކުރެވެމުން ހިނގަމުން ދާނެ ޖެހޭނެ"
މެދުހެންވޭރު ދާއިރާގެ މެމްބަރު އަލީ އާޒިމް
ސަރުކާރު މެމްބަރުންގެ ޝަރުތުތައް ހާމަކުރެއްވުމަށްފަހު އާޒިމް ވިދާޅުވީ އެ ޝަރުތުތައް ހަމަވާ މެމްބަރުންގެ ހަތަރެސްފައި ރައީސް އޮފީހުން ބަނދެފައިވާކަމަށެވެ. އަދި ސަރުކާރުން ބޭނުންވާ ގޮތަށް އެމީހުން ކޮންޓްރޯލު ކުރަމުންދާ ކަމަށެވެ.
"ރައީސް އޮފީހުގައި މިތާ ތިބއްވެި ބައެއް މެމްބަރުންގެ ހަތަރެސްފައި އޮންނަނީ ބަނދެފަ އެކޮޅުގައި ވާ ޖަހާފައި، ބޭނުންކޮޅަށް ވާ ދަމާލީމާ ކަންކަން އުސޫލުން މި ރައްޔިތުންގެ މަޖިލީހުގައި ކަންކަން ކުރަނީ"
މެދުހެންވޭރު ދާއިރާގެ މެމްބަރު އަލީ އާޒިމް
އާޒިމް ވިދާޅުވީ ރައްޔިތުންގެ މަޖިލީހަކީ ފަހަރެއްގައިވެސް ސަރުކާރު ތަމްސީލުކުރާ ތަނެއް ނޫންކަމަށެވެ. ރައްޔިތުންގެ ކަންބޮޑުވުން ހުންނަ ކަންކަމުގައި ސަރުކާރުން ބޭނުންވާހާ ގޮތަކަށް މަޖިލީހުން ނިންމުންތައް ނިންމަން ނުޖެހޭނެކަމަށް އާޒިމް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
