ވ. އާރަށުގެ މުއާމަލާތާއި ގުޅުވާ ކުރީގެ ރައީސް ޔާމީން އަބްދުލްގައްޔޫމުގެ މައްވަށް ދައުލަތުން އުފުލާފައިވާ ދެ ދައުވާއާއި ގުޅިގެން ހެކިންގެ ހެކިބަސް ނަގާއި، ހެކިންނާއި ސުވާލު ކުރުމުގެ މަރުހަލާ ނިމުނު ފަހުން ދައުލަތުން ހުށައެޅި އިތުރު ހެކިން ޝަރީއަތުން ބަލައިގެންފިއެވެ. 

އެ މައްސަލައާއި ގުޅިގެން މިއަދު ކޯޓުގައި އަޑުއެހުމެއް ބާއްވާފައިވާއިރު، މިއަދުގެ އަޑުއެހުން ފައްޓަވަމުން މައްސަލަ ބައްލަވާ އިސް ގާޒީ އަހުމަދު ޝަކީލު ވަނީ ދައުލަތުން ހުށަހެޅި އާ ހެކިތަކަކީ ޖިނާއީ އިޖްރައާތުގެ 135 ވަނަ މާއްދާގެ ދަށުން ބަލައިގަނެވޭނެ ހެކިތަކެއް ކަމަށް ނިންމަވާފައެވެ. 

ގާޒީ މިފަދައިން ނިންމަވާފައި ވީ ނަމަވެސް އެ ނިންމެވުން މުރާޖާ ކުރެއްވުމަށް އެ މައްސަލައިގައި ދައުވާ ލިބޭ ޔޫސުފް ނައީމުގެ ފަރާތްޕުޅުން ވަނީ އެދިލައްވާފައެވެ.

Advertisement

އެފަހުން ހެކިންނާއި ގުޅޭގޮތުން ވާހަކަދައްކަވަން ފައްޓަވަމުން ރައީސް ޔާމީންގެ ފަރާތްޕުޅުންވެސް ވަނީ ގާޒީގެ ނިންމެވުން މުރާޖާ ކުރެއްވުމަށް އެދިވަޑައިގެންފައެވެ. 

އެހެން ނަމަވެސް އެ ފުރުސަތު ދެވެން ނެތްކަމަށް އިސް ގާޒީ ވަނީ ވިދާޅުވެފައެވެ. އަދި ހެކިންނާއި ގުޅޭގޮތުން ވާހަކަދައްކަވާއިރު، އަލަށް ހުށައެޅި ހެކިތައް ހިފަނައިގެން ވާހަކަދެއްކެވުމަށްވެސް ގާޒީ ވަނީ ދައުލަތަށާއި، ދިފާއަށްވެސް އަންގަވާފައެވެ. 

ދައުލަތުގެ ފަރާތުން އާ ހެކީގެ ގޮތުގައި ހުށައެޅީ ރައީސް ޔާމިންގެ ފަރާތުން ހެކިންގެ ގޮތުގައި ހުށައެޅި އަހުމަދު ނަރީޝްގެ ހެކިބަހާއި، ކުރީގެ އިކޮނޮމިކް މިނިސްޓަރު މުހައްމަދު ސައީދު ދެއްވި ހެކިބަސް ނަފީ ކުރެވޭނެ ހެކިތަކެއްކަމަށް ދައުލަތުން ވަނީ ބަޔާންކޮށްފައެވެ. 

މިއަދު ކުރިއަށްދާ އަޑުއެހުން ދިގުލައިގެން ދިޔަ ނަމަވެސް ހެއްކާއި ގުޅޭގޮތުން ވާހަކަދައްކާ ނިމެންދެން މިއަދުގެ ޝަރީއަތް ކުރިއަށް ގެންދަވާނެކަމަށް މައްސަލަ ބައްލަވާ އިސް ގާޒީ ޝަކީލު ވަނީ ވިދާޅުވެފައެވެ.