މިރޭ ގަތަރުގައި ފަށާ ވޯލްޑް ކަޕުގެ މެޗުތައް ބަލަން މާލެ ސަރަހައްދުގައި ގިނަ އަދަދެއްގެ ބޮޑު ސްކްރީނުތައް ބަހައްޓައިފި އެވެ.

މިކަން އަންގައި މާލެ ސިޓީ ކައުންސިލުން ބުނީ، މާލެ އަދި ވިލިމާލޭގައި މިހާތަނަށް 14 ތަނެއްގައި ސްކްރީން ބަހައްޓަން ހުއްދަ ދީފައިވާ ކަމަށެވެ. އެގޮތުން ހުއްދަ ދީފައިވާ ތަންތަނުގެ ލިސްޓް ސިޓީ ކައުންސިލުން ވަނީ އާއްމު ކޮށްފައެވެ. އަދި ބޮޑު ސްކްރީން ބަހައްޓަން މިހާތަނަށް ހުއްދަ ދީފައިވާ ފަރާތްތައް އިތުރުވުމަކީވެސް އެކަށީގެންވާ ކަމެއް ކަމަށް މާކެ ސިޓީ ކައުންސިލުން ބުނެއެވެ.

ގަލޮޅު ސިޓީ ޕާކް

ޗާންދަނީ މަގު ވޮއްކޮޅު ގޯޅި

އާޓިފިޝަލް ބީޗް

އިއްޒުއްދީން މަގާއި ސަބްދެލި މަގު ގުޅޭ ކަންމަތި

ލައިމޫން ކެފޭ ކުރިމަތި

އަބަދައް އުފާ މަގާއި ތަނޑިރަތްމާ ގޯޅި ކަންމަތި

ވީއާރް ކެފޭ ހިންގަމުންދާ ގާކޮށި ބީ208 ގެ ބޭރު

އެސްޓީއޯ އިމާރާތް ހުންނަ ވެސްޓް ޕާކް ސަރަހައްދު

ނިޔަނދުރު ގޯޅި

މ. ޗަނބޭލީ މަގު

ބަނދަރު ސަރަހައްދުގެ ހުޅަނގުކޮޅު

ބަނދަރު ސަރަހައްދުގެ އިރުމަތީ ކޮޅު

ވ.ދިހަވެހިއާ ދިމާ ބަނދަރު ސަރަހައްދު

ބީއެމްއެލް ވިލިމާލެ ބްރާންޗާ ޖެހިގެން އޮންނަ ހުސްބިން

ވ.ޒިފިޔަސް ކުރިމަތީ ހުސްބިން

މީގެ އިތުރުން، ސިޓީ ކައުންސިލުން މިއަދު ކުރި އިއުލާނުގައި ވާގޮތުން، މެޗު ބަލަން މަގު ބަންދުކުރުމަށް އެދެމުންދާތީ ވޯލްޑް ކަޕްގެ މެޗުތައް ކުރިއަށްދާ ވަގުތު ބައެއް މަގުތައް ބަންދުވާނެ ކަމަށެވެ. އެގޮތުން، ކޮންމެ މެޗެއް ފެށުމުގެ 30 މިނެޓުން ފެށިގެން، މެޗު ނިމުމަށް ފަހު 30 މިނެޓާ ހަމައަށް ބަންދުވާނެ ކަމަށް އެ އިއުލާނުގައި ބުނެފައިވެއެވެ.

އަދި މެޗު ނިމުމަށް ފަހު އަނބުރާ ދަތުރުފަތުރު ކުރެވޭނެ ގޮތް ހަދަން ޖެހޭނެ ކަމަށާއި، އަދި މެޗު ފެށުމުގެ މާ ކުރިން ވެސް މަގު ބަންދު ނުކުރުމަށް ސިޓީ ކައުންސިލްގެ އިއުލާނުގައި އަންގާފައިވެ އެވެ.

ބަންދު ކުރަން ހުއްދަދީފައިވާ ސަރަހައްދުތައް މާލެ ސިޓީ ކައުންސިލްގެ ވެބްސްއިޓާއި ޓްވިޓާގައި އާންމުކުރަމުން ދާނެ ކަމަށް އެ ކައުންސިލުން ބުންޏެވެ.