އެމްއެމްޕީއާރްސީ މެދުވެރިކޮށް ވ. އާރަށް ދޫކުރި މައްސަލާގައި ދައުލަތުން ކުރާ ދައުވާ ސާބިތުކުރުމަށް ހެއްކެއްގެ ގޮތުގައި ހުށަހެޅި ދިއްގަރު ދާއިރާގެ ކުރީގެ މެންބަރު އަހުމަދު ނާޒިމްގެ ހެކިބަސް ބަލައިނުގަތުމަށް ދައުވާ ލިބޭ ކުރީގެ ރައީސް ޔާމީންގެ ފަރާތްޕުޅުން އެދިވަޑައިގެންފިއެވެ.
އާރަށް ކުއްޔަށް ދޫކުރުމުން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި އަދި އެ ފައިސާ ލޯންޑާ ކުރެއްވި ކަމަށް ބުނެ ޔާމީންގެ މައްޗަށް ދައުވާ ކުރާއިރު، އެމަނިކުފާނު ރިޝްވަތު ދެއްވި ކަމުގެ ކަމަށް ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށްވެސް ދައުވާކުރެ އެވެ.
މި މައްސަލައިގައި މިހާރު ކުރިއަށްދަނީ ހެއްކާ ގުޅޭގޮތުން ވާހަކަ ދެއްކުމެވެ. އެގޮތުން ޔާމީނުގެ ފަރާތުން ވަނީ ހެއްކާ ގުޅޭގޮތުން ވާހަކަ ދެއްކުމުގެ ބާކީ ބައި މިއަދުވެސް ކުރިއަށް ގެންދަވާފައިވާއިރު، ދައުލަތުގެ ހެކިތަކާއި ގުޅޭގޮތުން ވާހަކަ ދައްކަވަމުން ޔާމީނުގެ ވަކީލުން ވަނީ ރައީސް ޔާމީންގެ ގާތް އެކުވެރިއެއްގެ ގޮތުގައި ކުރިން މަސައްކަތްކުރެއްވި ނާޒިމްގެ ހެކިބަސް ބަލައިނުގަތުމަށް އެދިލައްވާފައެވެ.
އޭގެ ސަބަބުތައް ހާމަ ކުރައްވަމުން ދިފާއުން ވަނީ، ހެކިބަސް ދެއްވަމުން ނާޒިމް ވަނީ އޭނާގެ ހާޒިރުގައި އަދީބު ދޫވެއްސަށް 15 މިލިއަން ރުފިޔާ ގެނެސްދިން ކަމަށާ އެ ފައިސާ ގެނެސްދެއްވީ ކެމްޕޭނަށް ފައިސާއަށް ބޭނުންޖެހިފައިވާތީކަމަށް ވިދާޅުވެފައި ކަން ފާހަގަކުރައްވާފައެެވެ.
އަދި މީގެ އިތުރުން އެމްއެމްޕީއާރްސީ ހިޔާނަތް އުފަންވީވެސް ރިޔާސީ އިންތިޚާބުގެ ކެމްޕޭންގެ ދަރަނި ދެއްކުމުގެ ތެރެއިން ކަމަށް ނާޒިމް ވިދާޅުވި ކަން ފާހަގަކުރައްވައި ދިފާއުން ވިދާޅުވީ، ނާޒިމްއަކީ ޔާމީނުގެ ކެމްޕޭނުގެ މާލީ ކަންކަމުގައި އުޅުއްވި ފަރާތެއް ނޫން ކަމަށާއި، އޭނާ ދައްކާފައިވާ ވާހަކަތަކަކީ އަމިއްލަ ހިޔާލުގެ މައްޗަށް ދައްކާފައިވާ ވާހަކަތަކެއް ކަމަށެވެ. އަދި ނާޒިމްގެ ހެކިބަހަށް ބުރަދަން ދޭންޖެހޭ އެއްވެސް ސަބަބެއް ނެތް ކަމަށްވެސް ދިފާއުން ވިދާޅުވިއެވެ.
މީގެ އިތުރުން ވެސް ނާޒިމް ހެކިބަސް ދެއްވިއިރު އޭނާއަކީ މިހާރު ރައީސް ޔާމީނުގެ ގާތް އެކުވެރިއެއް ނޫން ކަމަށާ، އޭނާ ޖަލަށް ލީ ދުވަހުން ފެށިގެން ރައީސް ޔާމީނާ ގުޅުމެއް ނޯންނަކަމަށާ އެހެންނަމަވެސް، އޭނާ ރައީސް ޔާމީންއާ މެދު އަދާވަތްތެރިކަމެއް ނޯންނާނެކަމަށް ވިދާޅުވިއިރު، ޔާމީނުގެ ވަކީލުން ވަނީ ނާޒިމްއަކީ ޔާމީނާމެދު އަދާވަތްތެރިކަން އޮތް ހެއްކެއްކަމަށް ބަޔާން ކުރައްވާފައެވެ. އެހެންކަމުން އޭނާގެ ހެކިބަސް ބަލައި ނުގަތުމަށް ދިފާއުން ވަނީ އެދިލައްވާފައެވެ.
މި މައްސަލައިގައި ހެކިބަހާ ގުޅޭ ގޮތުން ވާހަކަދެއްކުމުގެ މަރުހަލާ މިހާރު ކުރިޔަށްދާއިރު، މިއަހަރު ނިމުމުގެ ކުރިން މި މައްސަލައިގައި ހުކުމާ ހަމައަށް ވާސިލުވުމަށް މަސައްކަތް ކުރައްވާ ކަމަށް ޝަރީއަތުން މީގެ ކުރިން ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
