ދުނިޔޭގެ ފެންވަރުގައި ކުޅެވޭ އެންމެ ފޯރި ގަދަ ފުޓްބޯޅަ މުބާރާތް، ފީފާ ވޯލްޑް ކަޕް ފެށިފައިވާއިރު، އެ މުބާރާތުގައި ކުޅޭ ބްރެޒިލް އަދި އާޖެންޓީނާ އަށް ސަޕޯޓް ކުރާ އިންޑިއާގެ ސަޕޯޓަރުންތަކެއްގެ މެދުގައި ހަމަނުޖެހުން ތަކެއް ހިނގައިފިއެވެ. 

އިންޑިއާގެ ކެރެލާ ސްޓޭޓުގައި ހިނގައިދިޔަ މި ހަމަނުޖެހުންތަކާއި ގުޅޭ ވީޑިއޯ މީސްމީޑިއާގައި އާއްމުވެފައިވާއިރު، ދެ ޓީމުގެ ސަޕޯޓަރުން އެއްބައެއް އަނެއް ބައެއްގެ ގައިގައި އަތުންނާއި ދަނޑި ބުރިބުރިން ތަޅައި، ކަރުގައި ހިފައި އެނޫންވެސް އަނިޔާދޭ މަންޒަރު ވީޑިއޯ އިން ފެނެއެވެެ. 

އެކަމާއި ގުޅިގެން ގިނަ ބަޔަކު އެ ސަރަހައްދަށް އެއްވެފައިވާއިރު، ހަމަނުޖެހުންތައް ހުއްޓުވުމަށް ދިޔަ ބައެއް މީހުންނަށް، ބްރެޒިލް އަދި އާޖެންޓީނާގެ ޖާޒީ ލައިގެން އެ ދެ ގައުމުގެ ދިދަ ހިފައިގެން ތިބި ސްޕޯޓަރުންނާއި އެނޫންވެސް މީހުން ވަނީ އަނިޔާދީފައެވެ. 

އިންޑިއާގެ ބްރެޒިލް އަދި އާޖެންޓީނާގެ ސަޕޯޓަރުން ތަޅާފޮޅުމަކަށް ދިޔަ ސަބަބެއް ސާފު ނުވި ނަމަވެސް، މިއަދު ވޯލްޑް ކަޕް ގައި އާޖެންޓީނާ އާއި ސައުދީ އަރަބިއްޔާ ކުޅުނު މެޗުން 1-2 އިން އާޖެންޓީނާގެ މައްޗަށް ސައުދީއިން ކުރި ހޯދާފައިވާކަން ފާހަގަކޮށްލަންޖެހެއެވެެ. 

ފީފާ ވޯލްޑް ކަޕާއި ގުޅިގެން އިންޑިއާގެ ސަޕޯޓަރުން ތަޅާފޮޅުން ގަނޑަކަށް ގޮސް، އެކެއް އަނެކެއް ގައިގައި ދަޑިންތަޅައި ކަރުގައި ހިފާ ހިސާބަށް ދިޔަ އިރު، އިންޑިއާ އަކީ ވޯލްޑް ކަޕްގައި ކުޅޭ ގައުމެއްވެސް ނޫން ކަން ފާހަގަކޮށްލަން ޖެހެއެވެ. އަދި އަމިއްލަ ގައުމު ނޫން އެހެން ގައުމަކަށްޓަކައި އެ ހިސާބަށް ސަޕޯޓަރުން ދިޔުމާއި ގުޅިގެން ގިނަ ބައެއްގެ ފާޑުކިޔުންތައް ވެސް އެމީހުންނަށް ވަނީ އަމާޒުވެފައެވެ.