ސިޔާސީ ވާދަވެރިކަމުގައި ދިވެހި ރާއްޖޭގެ އިސްލާމިކް މިނިސްޓަރަށާއި އެ މިނިސްޓްރީގެ މުވައްޒަފުން ކާފަރުކުރުމަކީ ބަލައިގަނެވޭނެކަމެއް ނޫން ކަމަށް ވެރިކަންކުރާ ކޯލިޝަނުގައި ހިމެނޭ އަދާލަތު ޕާޓީން ބުނެފިއެވެ. 

އަދަލާތު ޕާޓީން މިފަދައިން ބުނެފައި މިވަނީ އިއްޔެ އޮތް ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން އިސްލާމިކް މިނިސްޓްރީގައި ތިބީ ބަޣާވާތާއި ކުފުރުގެ ބައެއް ކަމަށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވުމާއި ގުޅިގެންނެވެ. 

ބޮންޑެ އަށް ރައްދުދީ އަދާލަތުން ކުރި ޓުވީޓެއްގައި ވަނީ ސިޔާސީ ވާދަވެރިކަމުގައި ދިވެހި ރާއްޖޭގެ އިސްލާމިކް މިނިސްޓަރަށާއި އެ މިނިސްޓްރީގެ މުވައްޒަފުން ކާފަރުކުރުމަކީ ބަލައިގަނެވޭނެކަމެއް ނޫންކަމަށް ބުނެފައެވެ. އަދި ކޮންމެ މީހަކު ކުރިޔަސް މުސްލިމުން ކާފަރުކުރުމަކީ ހަރުކަށި ހައްދުފަހަނައަޅާފައިވާ އަމަލެއް ކަމަށްވެސް އެޕާޓީން ބުންޏެވެ.

Advertisement

މިއާއެކު އެ ޕާޓީން ބުނީ، ސިޔާސީ ބޭނުމުގައި ވިޔަސް އެފަދަ ވާހަކަ ދެއްކެވުމަކީ ރާއްޖޭގެ ރައްޔިތުންގެ މަޖިލީހުގައި ޢިއްޒަތާއި ކަރާމަތާ އެކަށީގެންވާ ކަމެއްވެސްނޫން ކަމަށް ވާއިރު، ރައްޔިތުންގެ މަޖިލީހުގެ މެންބަރުންނަށް ދީފައިވާ ޚާއްސަ އިމްތިޔާޒުގެ ނިވަލުގައި ތިބެގެން މިފަދަ ހަރުކަށި ހައްދުފަހަނައަޅާފައިވާ ފިކުރު ފެތުރުމަކީ އެ ޕާޓީން ކުއްވެރިކުރާކަމެއް ކަމަށެވެ. 

ރައްޔިތުންގެ މަޖިލީހުގެ އިއްޔެގެ ޖަލްސާގައި ބަޖެޓު ކޮމިޓީގެ ބައެއް ބައްދަލުވުންތަކާ ގުޅުވައި ވާހަކަދައްކަވަމުން ބޮންޑެ ވިދާޅުވީ، ދާދި ފަހުން ކޮމިޓީ ބައްދަލުވުމަށް ވަޑައިގެން އިސްލާމިކް ޔުނިވާސިޓީގެ ބޭފުޅުން ވިދާޅުވި ގޮތުގައި އެމީހުންގެ އުންމީދަކީ "އިސްލާމުންގެ ރަން ޒަމާނުގައި ހުރިވަރަށް" ޔުނިވާސިޓީ ކުރިއެރުވުމެވެ.

އެކަމަކު އެކަން ނުކުރެވިގެން އުޅެނީ އެފަރާތުން ބުނި ގޮތުގައި މާލީ ދަތިކަން ހުރުމުން ކަމަށާއި، އިސްލާމިކް މިނިސްޓްރީގެ ފަރާތުން އެ ޔުނިވާސިޓީއަށް އެއްވެސް މާލީ އެހީތެރިކަމެއް ނުލިބޭ ކަމަށް ބޮންޑެ ވިދާޅުވި އެވެ.

"އިސްލާމިކް މިނިސްޓްރީ ހިސާރުކޮށްގެން މިތިބެނީ ބަޣާވާތުގެ ބައެއް، ބޮޑު ބަޣާވާތުގެ ބައެއް، ކުފުރުގެ ބައެއް. ހިސާރުކޮށްގެން މި އިސްލާމިކް ޔުނިވާސިޓީއަށް އެންމެ ލޯ ލާރިއެއްވެސް ނުދޭ،" ބޮންޑެ ވިދާޅުވި އެވެ.