މި އަހަރުގެ ޖޫން މަހު މާރާމާރީ ހިންގައި، ބަޔަކު މަރާލާފައިވާ ސ. ފޭދޫ، ސޮލިޑް، އުމުރުން 21 އަހަރުގެ މުޙައްމަދު ޒަޔާން މޫސާގެ މަރުގެ މައްސަލާގައި ކުޑަކުއްޖެއް ހިމެނޭހެން 8 މީހަކަށް ދައުވާ ކުރަން ފޮނުވާފައިވާ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފިއެވެ. 

ޒަޔާން މޫސާ މަރާލިކަމުގެ ތުހުމަތުގައި ހަތަރު ކުޑަ ކުދިން ހިމެނޭހެން ޖުމުލަ 11 މީހުން ވަނީ ހައްޔަރު ކޮށްފައެވެ. މީގެ ތެރޭގައި 15 އަހަރުގެ 2 ކުދިންނާއި 16 އަހަރުގެ ކުއްޖަކާއި 17 އަހަރުގެ ކުއްޖެއް ހިމެނެއެވެ.

އެހެން ނަމަވެސް ޕީޖީ އޮފީހުން އަދި ދައުވާ ކުރަން ފޮނުވާފައިވަނީ ޖުމުލަ 8 މީހުންނަށެވެ.

• ޔަޢީޝް އަންވަރު، ސ.ހިތަދޫ ކަދުރުމާގެ އަދި އައިލިޝް ޢަލީ، ސ.ފޭދޫ ފުފޫމާގެ

ޔައީޝް އަންވަރު އަދި އައިލިޝް ޢަލީ ގެ މައްޗަށް ދައުލަތުން 10 ދައުވާއެއް އުފުލާފައި ވެއެވެ. އޭގެތެރޭގައި، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުން، ބިރުދެއްކުން، ޖިނާއީ ކުށެއް ކުރުމުގައި ކުޑަކުއްޖަކު ބޭނުންކުރުމުގެ 8 ދައުވާ ހިމެނެއެވެ. 

• ސ.ފޭދޫ ދިރިމާގެ، އަޙްމަދު ޝުޢާޢު އާއި، ސ.ފޭދޫ ސަންޝައިން، އަޙްމަދު ނަބީލް އާއި، ސ.ފޭދޫ ކާމަރަގަގެ ޢަބްދުﷲ ނިޒާރު އާއި، ސ.ފޭދޫ ކަރަންފޫގެ އަދި އަޙްމަދު ޢަބްދުﷲ 

މި ހަތަރު މީހުންގެ މައްޗަށް ދައުލަތުން ކުރަނީ، ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މެރުމުގައި އެހީތެރިވުމުގެ ދައުވާ އާއި، ބިރުދެއްކުމުގެ އިތުރުން ޖިނާއީ ކުށެއް ކުރުމުގައި ކުޑަކުއްޖަކު ބޭނުންކުރުމުގެ 8 ދައުވާ އެވެ. 

• ޢަބްދުﷲ ޝިޔާޢު ރަޝީދު، ސ.ފޭދޫ ދިރިމާގެ
ޝިޔާޢުގެ މައްޗަށް ދައުލަތުން ކޮށްފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މެރުމުގައި އެހީތެރިވުމުގެ ދައުވާ އާއި ޖިނާއީ ކުށެއް ކުރުމުގައި ކުޑަކުއްޖަކު ބޭނުންކުރުމުގެ ހަތަރު ދައުވާ އެވެ. 

މި ހަތް މީހުންގެ މައްޗަށް ދައުވާ ކުރުމަށް 27 ނޮވެމްބަރު ވަނަ ދުވަހު ކްރިމިނަލް ކޯޓަށް ހުށަހަޅާފައިވާނެ ކަމަށް ޕީޖީ އޮފީހުން ބުނެފައިވެއެވެ. 

މީގެ އިތުރުން، މިމައްސަލައިގައި ޢުމުރުން 18 އަހަރު ނުފުރޭ ކުޑަކުއްޖެއްގެ މައްޗަށް ޤާނޫނު ނަންބަރު: 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 05 ވަނަ މާއްދާގެ (ހ) ގެ ދަށުން ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ، އަދި ޢުމުރުން 18 އަހަރު ނުފުރޭ އިތުރު 03 (ތިނެއް) ކުދިންގެ މައްޗަށް ޤާނޫނު ނަންބަރު: 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 05 ވަނަ މާއްދާގެ (ބ) ގެ ދަށުން ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގައި އެހީތެރިވުމުގެ ކުށުގެ ދަޢުވާ 06 އޮކްޓޫބަރު 2022 ދުވަހު ޖުވެނައިލް ކޯޓަށް ހުށަހަޅާފައިވާނެ ކަމަށް ޕީޖީ އޮފީހުން ބުންޏެވެ.