ގަޒުފުކުރި ފިރިހެނެއްގެ ގައިގައި 80 އެތިފަހަރުން ހައްދުޖަހަން ކުރި ހުކުމް ސުޕްރިމް ކޯޓުން ދަމަހައްޓައިފިއެވެ. 

ގދ ތިނަދޫގެ ފިރިހެނަކު ވަނީ އޭނާގެ އަންހެނުންގެ ބަނޑުގައި އޮތީ އޭނާގެ ދަރިއެއް ނޫންކަމަށް ބުނެ ގަޒުފުކޮށްފައެވެ. 

އޭނާގެ މައްޗަށް އެ ކުށް ސާބިތުވެފައިވަނީ ރެސްޓޯރެންޓެއްގެ ތެރޭގައި ފިރިހެނަކާ މުހާތަބުކޮށް ވާހަކަ ދައްކަމުން، އޭނާގެ އަންހެނުންގެ ބަނޑުގައި އޮތީ އޭނާގެ ދަރިއެއް ނޫން ކަމަށް ބުނި މައްސަލާގަ އެވެ. ދަށު ކޯޓާއި ހައި ކޯޓުން ވެސް ނިންމާފައި އޮތީ އޭނާގެ މައްޗަށް ކުށް ސާބިތުވާ ކަމަށެވެ.

Advertisement

އެ މައްސަލަ އެ މީހާގެ ފަރާތުން އިސްތިއުނާފުކޮށް، ބުނެފައިވަނީ ދަރިފުޅުގެ ނަސަބު ނަފީ ކުރުމަކީ ގާނޫނުލްއުގޫބާތު އޮތްގޮތުން އެ ކަން ގަޒްފުގެ ކުށަކަށް ނުވާނެ ކަމަށެވެ. އަންހެންމީހާ ޒިނޭ ކުރި ކަމަށް އޭނާ ސާފު އިބާރާތުން ބުނެފައި ނުވާތީ އަދި ދަރިފުޅުގެ ނަސަބު ނަފީ ކުރުމަކީ ގަޒްފުގެ ކުށަށް ނުވާނެ ކަމަށް ވެސް ބުނެފައިވެއެވެ. 

ހެކިންގެ ހެކިބަހުން އެނގުނު ގޮތުގައި އެހެން ފިރިހެނަކު، ފިރިމީހާއާ ދިމާލަށް ބުނެފައިވަނީ އޭނާގެ "އަންހެނުން (ނަން އުނިކޮށްފައި) ގެ ބަނޑުގައި އޮތީ (ފިރިމީހާ) ގެ ދަރިއެއް ނޫން ކަމާއި އެއީ (އެހެން ފިރިހެނެއް) ގެ ދަރިއެއް" މިފަދައިންނެވެ.

އެހެން ނަމަވެސް ސުޕްރީމް ކޯޓުން ކުރި ހުކުމުގައި ވަނީ އިސްލާމީ އުއްމަތުގެ ޖުމްހޫރު އިލްމުވެރިންގެ ބަހަށް ބަލާއިރު، ޒިނޭ ކުރިކަމަށް ސީދާ ނުބުންޏަސް، ސަބަބުވެރި އިންސާނެއްގެ ވިސްނުމުން ބަލާއިރު އެއީ ޒިނޭގެ ތުހުމަތަކަށް ވާނަމަ، ގަޒްފުގެ ކުށް ސާބިތުވާނެ ކަމަށެވެ. އަދި ވައްބަހުން ވެސް ގަޒްފު ކުރެވޭނެ ކަމަށް ހުކުމުގައިވެ އެވެ.

ސުޕްރީމް ކޯޓުގެ ތިން ފަނޑިޔާރުންގެ އިއްތިފާގުން ކުރެއްވި އެ ހުކުމުގައިވާ ގޮތުން، މަޖާޒީ ގޮތެއްގައި ނުވަތަ އިޝާރާތަކުން ޒިނޭގެ ތުހުމަތު ކުރިޔަސް، ހައްދު ގާއިމް ނުކުރެވޭނެ އެވެ. އެއީ ހައްދުތައް ގާއިމް ކުރުމުގައި ޝައްކުތަކުން ދުރުވާން ޖެހޭއިރު، އެ ހާލަތުގައި ޝައްކެއް އުފެދޭނެތީ ކަމަށް ހުކުމުގައިވެ އެވެ.

ސުޕްރީމް ކޯޓުން އެ މައްސަލަ ބެއްލެވީ ފަނޑިޔާރު ހުސްނުއްސުއޫދާއި ފަނޑިޔާރު އަލީ ރަޝީދުގެ އިތުރުން ފަނޑިޔާރު ޑރ. އަޒްމިރަލްދާ ޒާހިރެވެ. ބެންޗުގެ ރިޔާސަތަކީ ފަނޑިޔާރު ސުއޫދެވެ.