ހދ. ވައިކަރަދޫގައި ޖިންސީ ގޯނާ ކޮށް ރޭޕް ކުރަން މަސައްކަތްކުރި 81 އަހަރުގެ އަންހެންމީހާ ނިޔާވިއިރުވެސް މައްސަލާގަައި ތުހުމަތުކުރެވޭ މީހާ ހައްޔަރު ނުކުރާ ކަމަށް ފުލުހުން ބުނެފިއެވެ. 

ޖިންސީ ގޯނާ ކުރެވުނު އަންހެން މީހާގެ ދަރިފުޅު މީގެ ކުރިން އެކަމާއި ގުޅިގެން ކޮށްފައިވާ ޓުވީޓެއްގައި ވަނީ ރޭޕް ކުރަން މަސައްކަތް ކުރި ފިރިހެން މީހާގެ ފޮޓޯއެއްވެސް ހިއްސާ ކޮށްފައެވެ. އަދި ފުލުހުންނަށް އެމީހާ ހައްޔަރު ނުކުރެވުފައި ވަނީ އޭނާ ކޯޓު އަމުރެއް ނުލިބިގެން ކަމަށް ފުލުހުން ބުނެފައިވާ ކަމަށާ، އެ މީހާ މިހާރު ޑިންގީއެއްގައި އެރަށުވެސް ފުރައިގެން ގޮސްފައިވާ ކަމަށް ބުނެފައިވެއެވެ. 

މީގެ އިތުރުން އޭނާ ބުނީ، އެ މީހާ އަކީ ލަނޑާ ދޯންޏެއްގައި މަސައްކަތް ކުރާ ށ. ނޫމަރާ އަަށް ނިސްބަތްވާ މީހެއް ކަމަށާ އޭނާ ހައްޔަރުކޮށްފައިވާ ކަމެއް އަދި ނުވާ ކަމެއްވެސް ނޭނގޭ ކަމަށެވެ. 

Advertisement

މިކަމާއި ގުޅިގެން ފުލުހުން އޭރު ވިދާޅުވީ، ހދ. ވައިކަރަދޫގައި 81 އަހަރުގެ އަންހެނަކަށް ޖިންސީ ގޯނާ ކުރަން މަސައްކަތް ކުރި މައްސަލައެއް ނޮވެމްބަރު 11 ވަނަ ދުވަހުގެރޭ 19:00 ހާއިރު އެ އިދާރާއަށް ރިޕޯޓް ކޮށްފައިވާ ކަމަށެވެ. އަދި އެ މައްސަލަ އާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށްވެސް ފުލުހުން ވިދާޅުވިއެވެ. 

ޖިންސީ ގޯނާ ކުރެވުނު އެ އަންހެން މީހާ، މިހާރު ނިޔާވެފައިވާކަމަށް ވޮއިސް އަށް މައުލޫމާތު ލިބިފައިވާއިރު، އެ މީހާ އަށް ޖިންސީ ގޯނާ ކުރަން މަސައްކަތް ކުރި މީހާ ހައްޔަރު ކުރެވިފައިވޭތޯ 'ވޮއިސް' އިން ކުރި ސުވާލަކަށް ޖަވާބު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، އެ މައްސަލާގައި އަދިވެސް މީހަކު ހައްޔަރު ކޮށްފައި ނުވާކަމަަށާއި، މައްސަލަ އާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ.