ރާވައިގެން ޑްރަގު ވިޔަފާރި ކުރަމުންދިޔަ ނެޓްވޯކެއް ފުލުހުން އަތުލައިގެންފިއެވެ.

ފުލުހުން ހިންގި އޮޕަރޭޝަނާއި ގުޅޭ ތަފްސީލް ފުލުހުން އަދި ހާމަކޮށްފައެއް ނުވާއިރު މި އޮޕަރޭޝަނުގައި 6 މީހަކު ވަނީ ހައްޔަރުކޮށްފައެވެ. އަދި ހައްޔަރުކުރި އެންމެންނަކީ ދިވެހި ފިރިހެނުންނެވެ.

މިމީހުންގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓުން ނެރެފައިވާ އަމުރުގައި ބުނެފައި ވަނީ، އެމީހުން ހައްޔަރު ކޮށްފައިވަނީ، ގިނަ އިންތިޒާމުތަކާއެކު ރޭވިގެން ހިންގަމުންދިޔަ ޑްރަގު ނެޓްވޯކެއް އަތުލުމަށް ހިންގި އޮޕަރޭޝަނެއްގައި ކަމަށް ފުލުހުން ބުނެފައިވާ ކަމަށެވެ. 

Advertisement

މީގެ އިތުރުން މި އޮޕަރޭޝަންގައި ފުލުހުން ބަލައި ފާސްކުރި ތަންތަނުން އެކި ގޮތްގޮތަށް ޕެކްކޮށްފައިވާ ގިނަ އަދަދެއްގެ މަސްތުވާތަކެއްޗާއި، ގިނަ އަދަދަދެއްގެ ފައިސާވެސް ހޯދާފައިވާއިރު، މަސްތުވާތެތި ބަންދުކުރުމަށް ބޭނުން ކުރާ އާލަތްތަކާއި، ބަރުދަން ބެލުމަށް ބޭނުން ކުރާ އާލާތްތައްވެސް ފެނިފައިވާކަަމަށް ފުލުހުން ޝަރީއަތުގައި ބުނެފައިވާ ކަމަށް ބަންދު އަމުރުގައި ވެއެވެ. 

އަދި މިމައްސަލާގައި ހައްޔަރު ކުރީ 30 އަހަރާއި 47 އަހަރާއި ދެމެދުގެ މީހުން ކަމަށްވާއިރު، އޭގެތެތެރެއިން ހަ މީހުންގެ ތެރެއިން، ތިން މީހެއްގެ ބަންދަށްވަނީ 30 ދުވަސް އަދި ދެ މީހެއްގެ ބަންދަށް 25 ދުވަސް ކްރިމިނަލް ކޯޓުން ޖަހާފައިވެއެވެ. އަދި އެކަކުވަނީ ޝަރީއަތް ނިމެންދެން ބަންދުކޮށްފައެވެ.

މިމައްސަލަ ފުލުހުން ދަނީ އިތުރަށް ތަހުގީގް ކުރަމުންނެވެ.