މި އަހަރުގެ މިހާތަނަށް ސްކޭމް މައްސަލަ ތަކާއި ގުޅިގެން 23 މިލިއަނެއްހާ ރުފިޔާގެ ގެއްލުން ވެފައިވާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވިދާޅުވެއްޖެއެވެ.

ސީޕީ މިފަދައިން ވިދާޅުވީ މަލްޓި އެޖެންސީ ވޯކްޝޮޕް އޮން ކޮމްބެޓިން ސްކޭމް އިންދަ މޯލްޑިވްސް ފެށުމުގެ ގޮތުން ވާހަކަ ދައްކަވަމުންނެވެ. 

ހަމީދު ވިދާޅުވީ ރާއްޖޭގައިވެސް ސްކޭމްގެ މައްސަލަތައް ވަރަށް ބޮޑަށް ގިނަވަމުންދާއިރު، އެފަދަ ވޯކްޝޮޕަކީ އެފަދަ ކަންކަމާއި ގުޅޭ އިތުރު މައުލޫމާތު ހޯދައި ދެނެގަންނަން ކުރިއަށް ގެންދިއުން މުހިންމު ވޯކްޝޮޕެއް ކަމަށެވެ.

"އެނގިވަޑައިގަންނަވާނެ ފަދައިން ސްކޭމްގެ މައްސަލަތަކަކީ ރައްޔިތުންގެ ކަންބޮޑުވުންތައް އޮތް، ރައްޔިތުންނަށް މާލީ ބޮޑެތި ގެއްލުންތަކެއްވަމުންދާ މައްސަލައެއް. މި އަހަރުގެ މިހާތަނަށް 998 ސްކޭމްގެ މައްސަލަތަ ހުށަހަޅައިފައިވޭ. އަދި ޖުމްލަ 23 މިލިއަނެއްހާ ރުފިޔާގެ ގެއްލުން ލިބިފައިވޭ،" ސީޕީ ހަމީދު ވިދާޅުވިއެވެ.

އާއްމު ރައްޔިތުންނާއި އެފަދަ ބޮޑު ގެއްލުންތަކެއް ވެފައިވާއިރު އެއީ އިގްތިސާދީ ނަޒަރަކުން ބަލާއިރުވެސް އަންދާޒާ ކުރެވޭނެ ގެއްލުމެއް ނޫންކަމަށް ވެސް ސީޕީ ވިދާޅުވިއެވެ. އެހެންކަމުން އެކަންކަން ހައްލު ކުރުމަށް އެންމެހައި މުވައްސަސާތަކުން ގުޅިގެން މަސައްކަތް ކުރަން ޖެހޭކަން ފާހަގަކުރައްވައި ހަމީދު އިތުރަށް ވިދާޅުވީ، މިއަދު ފެށުނު މަލްޓި އެޖެންސީ ވޯކްޝޮޕަކީ އެ މިސްރާބަށް އެޅޭ ވަރަށް ރަނގަޅު ފިޔަވަޅެއް ކަމަށެވެ.  

މި ވޯކްޝޮޕަކީ ސްކޭމްގެ މައްސަލަތަކާއި އިކޮނޮމިކް ކްރައިމްއާ ގުޅޭގޮތުން ފުލުހުންނާއި އިތުރު ފަރާތަކުން ގުޅިގެން ބާއްވާ ވޯކްޝޮޕެކެވެ.