ތިލަމާލެ ބުރިޖު ހެދުމުގެ މަސައްކަތްކުރާ އެފްކޯންސް ކުންފުނިން ބޭނުންކުރަމުން އަންނަ ކެރޭނެއް ކަނޑަށް ވެއްޓުމާއި ގުޅިގެން ބައެއް ފަރާތްތަކުން މިކަމުގެ އަސްލު އޮޅޭގޮތަށް ހަބަރު ފަތުރަމުން ގެންދާ ކަމަށް ޕްލޭނިންގ މިނިސްޓްރީން ބުނެފިއެވެ. 

ތިލަމާލެ ބުރިޖު ހެދުމުގެ މަސައްކަތް ކުރުމަށް ބޭނުން ކުރަމުން އައި ކެރޭނެއް އިއްޔެ ކަނޑަށް ވެއްޓިފައިވާއިރު އެ ކެރޭނު ވެއްޓުމުގެ ސަބަބުން ކެރޭނު ހަރުކޮށްފައިހުރި ޕްލެޓުފޯމުވެސް އަރިއަޅައިލާފައިވެއެވެ. 

އެކަމާއި ގުޅިގެން މައުލޫމާތު ދެމުން ޕްލޭނިންގ މިނިސްޓްރީން ކުރި ޓްވީޓެއްގައި ބުނީ، ތިލަމާލެ ބްރިޖް މަޝްރޫއުގެ މަސައްކަތުގެ ތެރެއިން ވިލިމާލޭ ކައިރީގައި މަސައްކަތް ކުރަމުންދިޔަ ޖެކްއަޕް ޕްލެޓްފޯރމްގައި ބަހައްޓާފައިވާ މޯބައިލް ކްރޭންއަކުން ޕައިލިންގް މަސައްކަތް ފެށުމަށް ބޭނުންވާ ބައެއް މެޓީރިއަލް އުފުލަނިކޮށް ކްރޭންގެ ބޫމް ފެއިލްވެފައިވާ ކަމަށެވެ. 

‏އަދި އެ ހާދިސާގައި އެއްވެސް މީހަކަށް އަދި އިތުރު އިކުއިޕްމަންޓަކަށް ގެއްލުމެއްނުވާ ކަމަށް އެ މިނިސްޓްރީން ބުންޏެވެ. އަދި ކްރޭންގެ ބޫމް ޖެކްއަޕް ޕްލެޓްފޯރމް މަތިން މިހާރު ނެގިފައިވާކަން ފާހަގަކޮށް އެ މިނިސްޓްރީން ވަނީ އެކަމާއި ގުޅިގެން އެ މަޝްރޫއުގެ މަސައްކަތުގެ ޝެޑިއުލްއަށް އެއްވެސް ބަދަލެއް އަންނާނެކަމަކަށް ނުބެލެވޭ ކަމަށް ބުނެފައެވެ.

‏"މި ހާދިސާއާއި ގުޅިގެން ބައެއް ފަރާތްތަކުން މިކަމުގެ އަސްލު އޮޅޭގޮތަށް ހަބަރު ފަތުރަމުން ގެންދާކަން މި މިނިސްޓްރީއިން ފާހަގަކުރަމެވެ." ޕްލޭނިންގ މިނިސްޓްރީން ބުނެފައިވެއެވެ.