ދިވެހިރާއްޖޭގެ ކަނޑުން ބައެއް އިންޑިއާއަށް ވިއްކާލުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފޮނުއްވެވި ސިޓީފުޅު އަދި ލީކު ވާނެކަމަށް ޕީއެންސީގެ ނައިބުރައީސް އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މިފަދައިން ވިދާޅުވެފައިވަނީ ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުންނެވެ.
އެ ޖަލްސާގައި ޝުޖާއު ވަނީ ސަރުކާރުން ކުލަގަދަކޮށް މަސްވެރިންގެ ދުވަސް ފާހަގަކުރިއިރު، މަސް ކަނޑުތައް އަވައްޓެރި އިންޑިއާއަށް ވިއްކާލާފައިވާކަމަށް ތުހުމަތު ކުރައްވާފައެވެ.
ރާއްޖޭގެ ސަރަހައްދުން ބައެއް ގެއްލޭގޮތަށް ފޯލަވައްސަކީ މޮރިޝަސްގެ ސިޔާދަތު ހިނގާ ތަނެއްކަން ގަބޫލުކުރައްވާ ރައީސް ސޯލިހު ފޮނުއްވެވި ސިޓީފުޅު ސިއްރުކުރައްވައިގެން ހުންނެވި ނަަމަވެސް އެ ސިޓީފުޅުވެސް އަދި ލީކުވެ، ކަނޑު ވިއްކާލިކަން ފަޅާއަރާނެކަމަށް ޝުޖާއު ވިދާޅުވިއެވެ.
އެކަމާއި ގުޅުވާ ޝުޖާއު އިތުރަށް ވިދާޅުވީ، ސަރުކާރުން ކަނޑު ވިއްކާ ނުލާނަމަ، ފޯޅަވަހި މައްސަލައާއި ގުޅިގެން ފުލުހުންނާއި ބައްދަލުކޮށް ހަގީގަތް އޮޅުވާލަން މަސައްކަތް ނުކުރާނެކަމަށެވެ.
"ބައްލަވާ! ވައްކަމެއް މީގެ ތެރޭގައި (ފޯޅަވަހި މައްސަލައިގައި) ނުހިމެނޭ ނަމަ އަމިއްލައަށް ޖެހޭތަ ދިވެހި ފުލުހުން ކައިރިއަށް ދާން؟ ތިމަންނަމެން މީގެ މައުލޫމާތު ހިއްސާކުރަން ބޭނުމޭ.. މިއީ ކުރަން ޖެހޭ ކަމެއްތަ؟ ދިވެހި ފުލުހުންނާއި ސިފައިން އެ ތިބީ ކަނޑު ވިއްކާލި މައްސަލައިގައި ރުޅި އައިސްފައި. އަޅުގަނޑުމެންނަށް އެނގޭ! ސިޓީ ފޮރުވައިގެން އުޅުނަސް އެ ސިޓީ އެބައޮތް އޮތް ހިސާބެއްގައި. އަދި އެ ސިޓީ ލީކުވާނެ"
ޕީއެންސީގެ ނައިބުރައީސް އިބްރާހިމް ޝުޖާއު
ޝުޖާއު ވިދާޅުވީ މިއަދު މި ގައުމު އޮތް ހާލަތާއި މެދު ރައްޔިތުން ވަރަށް ކަންބޮޑުވާކަމަށެވެ. އަދި މި ގައުމު މި އޮތް ހާލަތުން ނަގައި ގަނެވޭނީ މި ސަރުކާރު ބަދަލުކޮށްގެންކަމަށް ޝުޖާއު ވިދާޅުވިއެވެ.
އެއާއެކު އޭނާ ވަނީ މި ސަރުކާރު ބަދަލުކުރުމަށް ރައްޔިތުން ގަދައަޅާ މަސައްކަތް ކުރުމަށްވެސް ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
