ގޮންޖެހުންތަކާ އެކުވެސް ރާއްޖޭގެ އިގްތިސާދު އަންނަނީ ކުރިއަރަމުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު (މަވޯޓާ) ވިދާޅުވެއްޖެ އެވެ. 

މަވޯޓާ މިފަދައިން ވިދާޅުވެފައިވަނީ މި ސަރުކާރަށް ތައުރީފުކުރައްވާ ކުރެއްވި ޓްވީޓެއްގައެވެ. 

މަވޯޓާ ވިދާޅުވީ، ފަތުރުވެރިކަމުގެ ސިނާޢަތަށް ކަނޑައެޅިފައިވާ ލަނޑުދަނޑިތައް މިހާ ދަތު ދުވަސްވަރެއްގައިވެސް މިވަނީ ޙާޞިލުކުރެވިފައިކަމަށެވެ.

އަދި ރާއްޖޭގެ އިގްތިސާދު 7 ޕަސެންޓަށް ވުރެ ކުރިއަރާނެ ކަމަށް ލަފާކޮށްފައިވާކަމަށާ، ސަރުކާރުން އެންމެ ބޮޑު އިސްކަމެއް ދެނީ ސިޔާސަތުތައް ތަންފީޒުކުރުމަށްކަމަށްވެސް އޭނާ ވަނީ ވިދާޅުވެފަ އެވެ. 

މަވޯޓާ ވިދާޅުވި ގޮތުގައި، ރާއްޖޭގެ އިގްތިސާދު ރަނގަޅުވަމުން އަންނަ އެންމެ ބޮޑު ސަބަބަކީ ރާއްޖޭގެ ފަތުރުވެރިކަން ރަނގަޅުމެވެ. އެކަން ބޭރުގެ ފަރާތްތަކުންވެސް ފާހަގަކުރަމުން އަންނަަކަމަށް މަވޯޓާގެ އެ ޓްވީޓުގައި ވިދާޅުވެފައިވެއެވެ. 

ކުރިއަށްއޮތް 6 ދުވަހުގެތެރޭ މިއަހަރަށް ކަނޑައަޅާފައިވާ ފަތުރުވެރިކަމުގެ އަމާޒު ހާސިލްކުރެވޭނެކަމަށް ޓޫރިޒަމް މިނިސްޓްރީންއިވެސް ވަނީ ލަފާކޮށްފައެވެ. 

ޓޫރިޒަމް މިނިސްޓްރީގެ އެންމެ ފަހުގެ ހިސާބުތައް ދައްކާގޮތުން އަހަރުގެ މިހާތަނަށް ރާއްޖެއަށް ވަނީ 1.5 މިލިއަން ފަތުރުވެރިން އައިސްފައެވެ. އަދި މިއަހަރުގެ ތެރޭގައި 1.6 މިލިއަން ފަތުރުވެރިން ރާއްޖެ ގެނައުމަކީ ސަރުކާރުގެ އަމާޒެވެ.