ނާޤާބިލުކަމުގެ އަގަކީ ދަރަންޏަށްވުރެ ވެސް ބޮޑު އަގެއްކަމަށް ޕީއެންސީގެ ނައިބު ރައީސް އަދި ރައްޔިތުން މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ.

ބްރިޖު މަސައްކަތް ކުރިއަށްދާގޮތަށް ކަންބޮޑުވުން ފާޅުކުރައްވާ ކުރެއްވި ޓްވީޓެއްގައި ސައީދު ވިދާޅުވީ، ނާޤާބިލުކަމުގެ ޚަރަދަކީ ހަމައެކަނި ބޮޑު ދަރަނި އަނބުރާ ލިބުން ނޫން ކަމަށާއި އެއީ އެއަށްވުރެ މާބޮޑު ޚަރަދެއް ކަމަށެވެ.

"ކޮންޓްރެކްޓަރު އެމީހުންގެ މަސައްކަތްތަކާއި ގުޅޭގޮތުން ވާހަކަދައްކަންވީ ވަގުތު މިހާރު އައިސްފި ނޫންތޯ؟ ނުވަތަ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ތަކުރާރުކޮށް ބްރިޖު ހުޅުއްވަވާ ތާރީޚު ބަދަލުކުރައްވާތީ މަސައްކަތްތެރިން އަބަދުވެސް ހިތްހަމަޖެހިގެން ތިބެނީތޯ؟" ސައީދު ސުވާލުކުރައްވާފައިވެއެވެ.

Advertisement

ތިލަމާލޭ ބްރިޖު ގެ މަސައްކަތް ފެށުނީއްސުރެ ވެސް އިދިކޮޅުން އަންނަނީ އެ މަސައްކަތަށް ފާޑުކިޔަމުންނެވެ. އެގޮތުން އެ މަސައްކަތް ލަސްވުމާއި އަދި ބްރިޖް ޕްލެޓްފޯމު ފަރަށް އެރުމާއި ގުޅިގެންވެސް ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފައެވެ. މީގެ އިތުރުން، ދާދިފަހުން ބްރިޖުގެ މަސައްކަތް ކުރަނިމުން ދިޔަ ކެރޭނެއް ބިންދައިގެންދާ ވީޑިއޯއަށް ވެސް ގިނަ ބައެއްގެ ފާޑުކިޔުންތައް އަމާޒުވެފައިވާއިރު، އެ މަސައްކަތުގެ ފެންވަރާއި މެދު ވެސް އާއްމުން އަންނަނީ ސުވާލު އުފައްދަމުންނެވެ.