‏ކަށުނަމާދު ޕޭޖް ހިންގާ ފަރާތައް ޕޭޖް ހިންގުން މަނާކޮށް ، އެކަން ހުއްޓާލުމަށް މާލެ ސިޓީ ކައުންސިލުން އެންގިކަމަށް ދެކެވޭ ވާހަކައަކީ އެއްވެސް ހަގީގަތެއް އެކުލެވޭ ވާހަކައެއް ނޫންކަމަށް އެ ކައުންސިލުން ބުނެފިއެވެ. 

ސިޓީ ކައުންސިލުން މިފަދައިން ހާމަކޮށްފައި މިވަނީ، ކައުންސިލުން ކުރަންޖެހޭ ކަމެއް އަމިއްލަ ފަރުދެއްގެ ހައިސިއްޔަތުން ނުކުރޭވޭނެކަމަށް ބުނެ ކަށުނަމާދު އިއުލާންކުރުން ހުއްޓާލަން މާލޭ ސިޓީކައުންސިލުން އެ ޕޭޖު ހިންގާ ފަރާތް ކަމަށްވާ އަހުމަދު މުނައްވަރު އަށް އަންގާފައިވާ ކަމަށް ބުނުމާއި ގުޅިގެން، އެކަން އޮތްގޮތް ހާމަކުރުމަށް އެ ކައުންސިލުން ކުރި ޓުވީޓެއްގައެވެ.

އެގޮތުން މަލެ ސިޓީ ކައުންސިލުން ބުނީ، ކަށުނަމާދު ޕޭޖް ހިންގާ ފަރާތައް ޕޭޖް ހިންގުން މަނާކޮށް ، އެކަން ހުއްޓާލުމަށް މާލެ ސިޓީ ކައުންސިލުން އެންގިކަމަށް ދެކެވޭ ވާހަކައަކީ އެއްވެސް ހަގީގަތެއް އެކުލެވޭ ވާހަކައެއް ނޫންކަމަށެވެ. އަދި މާލެ ސިޓީ ކައުންސިލުގެ އެއްވެސް އޮފިޝަލަކު އެޕޭޖު ހިންގާ ފަރާތައް އެފަދަ ރަސްމީ އެއްވެސް އެންގުމެއް އަންގާފައި ނުވާނެކަމަށްވެސް އެ ކައުންސިލުން ބުނެފައިވެއެވެ. 

މިކަމާއި ގުޅިގެން މާލެ ސިޓީ ކައުންސިލްގެ މީޑިއާ އޮފިޝަލް ވިދާޅުވީ، ކަށު ނަމާދުގެ މައުލޫމާތަކީ ކޮންމެ ރަށެއްގެ ވެސް ކައުންސިލުން ކުރާ ކަމެއް ކަމަށެވެ. މީހުން ވިހެއުމާއި، މަރުވުމުގެ ދަފްތަރު ހެދުމަކީ ލާމަރުކަޒީ ގާނޫނުގެ ދަށުން ސިޓީ ކައުންސިލަށް މަތިކޮށްފައިވާ ޒިންމާއެވެ. 

ކަން މިހެން އޮތްއިރު، ކަށު ނަމާދު ޕޭޖް ހިންގަނީ ސިޓީ ކައުންސިލްގެ މުވައްޒަފެއް ކަން ފާހަގަކުރައްވައި މާލެސިޓީ ކައުންސިލްގެ މީޑިއާ އޮފިޝަލް ވިދާޅުވީ، ސިޓީ ކައުންސިލުގެ ދަފްތަރުން މައުލޫމާތު ހޯދައިގެން މަގާމުގެ ބޭނުން ނާޖާއިޒު ގޮތުގައި ހިފައިގެން އެފަރާތުން އައީ އަމިއްލަ ޕޭޖެއް ހިންގަމުން ކަމަށެވެ.