ރައީސުލްޖުމްހުރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ހޯއްދެވި އެއްވެސް ނާޖާއިޒު މަންފާއެއް ނޯންނާނެކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ޝަރީފް ތާއީދުކުރައްވަނީ ސަރުކާރުގެ ތެރެއިން ބޮޑެތި މަންފާތަކެއް ލިބިވަޑައިގަންނަވާތީކަމަށް އެމްޑީޕީގެ ބައެއް މެންބަރުން ތުހުމަތުކުރެއްވުމާއި ގުޅިގެން އޭނާ ކުރެއްވި ޓުވީޓެއްގައި ވިދާޅުވީ، ސަރުކާރުން ބޮޑެތި މަންފާތައް ހޯއްދަވާ ބައެއް ބޭފުޅުން އެހެން މީހުންނާ ދިމާލަށް ތާއަބަދު ތުހުމަތުގެ އިނގިލި ދިއްކުރައްވަމުން ގެންދަވާ ކަމަށެވެ.
އަދި ސަރުކާރުން އޭނާ ކުރި ވައްކަމެއް އަދި ހޯދި ނާޖާއިޒު މަންފާއެއް ނޯންނާނެކަމަށާ، އޭނާއަށް ކުރާ ތުހުމަތުތަކަކީ ސިޔާސީ ބޭނުމެއްގައި އަބުރު ކަތިލަން ކުރާ ތުހުމަތުތަކެއް ކަމަށްވެސް އޭނާ ވިދާޅުވިއެވެ.
"ސަރުކާރުން އެކި ވަރުވަރުގެ ކޮންޓްރެކްޓުތައް ނަންގަވައިގެން ތިއްބެވި ބޭފުޅުންނާއި ސަރުކާރަށް ބޮޑު އަގުގައި ތަކެތި ވިއްކަވާ ބޭފުޅުން އެހެން މީހުންނަށް ތުހުމަތުގެ އިނގިލި ދިއްކުރެއްވުން ވަނީ ހެއްވާ ކަމަކަށް. ހަމަ ގައިމުވެސް އަޅުގަނޑު ހޯދި ކޮންޓްރެކްޓެއް، ސަރުކާރަށް ވިއްކި މުދަލެއް، ކުއްޔަށް ދިން އެއްޗެއް ނޯންނާނެ." ޝަރީފް ވިދާޅުވިއެވެ.
މީގެ އިތުރުން ޝަރީފު ކުރެއްވި ޓްވީޓެއްގައި ވިދާޅުވީ، ބައެއް ސިޔާސީ ލީޑަރުން ކެމްޕޭންކުރައްވައި ރައްޔިތުންގެ ތާއީދު ހޯއްދަވަން ބޭނުންކުރައްވާ ހަމައެކަނި އުކުޅަކީ އެހެން މީހުންގެ ބޮލުގައި ދޮގު ތުހުމަތުތަކާއި ވަގު ބަދުނާމު އެޅުވުމެވެ. އަދި އެ ބޭފުޅުން ދެކެވަޑައިގަންނަވާ ގޮތުގައި އަމާނާތްތެރިވެފައި އަމިއްލަ އެދުމެއް ނޯންނަނީ ހަމައެކަނި އެ ބޭފުޅުންނަށް ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
