އިންތިހާބުތަކުގައި ބައިވެރިވާ ކެންޑިޑޭޓުންގެ އިސްތިހާރު ހިއްޕުމަށް ނުވަތަ ބެނާ ދެމުމުގެ ހުއްދަ ހޯދުމުގެ ފުރުސަތު މާލެ ސިޓީ ކައުންސިލުން ހުޅުވާލައިފިއެވެ.
މާލެ ސިޓީ ކައުންސިލުން ނެރުނު ބަޔާނެއްގައި ބުނީ، ރާއްޖޭގައި ބާއްވާ ރިޔާސީ އިންތިޚާބުގައި ވާދަ ކުރައްވާ ކެނޑިޑޭޓެއް އައްޔަން ކުރެއްވުމަށް ޕާޓީ ތަކުގައި ބާއްވާ އިންތިޚާބުތަކާއި އަދި ރިޔާސީ އިންތިޚާބަށް ވާދަކުރައްވާ ކެންޑިޑޭޓުންގެ ފަރާތްތަކަށް ކެމްޕެއިން ކުރެއްވުމަށް ތައްޔާރުކުރައްވާ ޕޯސްޓަރ ތަކާއި ބެނާތައް މާލޭ ސިޓީގެ މަގުތަކާއި އާންމު ތަންތަނުގައި ބެހެއްޓުމައި ހިއްޕުމަށް އެދޭ ފަރާތްތަކުން ހުއްދަ ހޯދުމަށް އެދި ހުށަހެޅުމުގެ ފުރުޞަތު ހުޅުވާލާފައިވާ ކަމަށެވެ.
މިކަމާއި ގުޅޭގޮތުން މާލެ ސިޓީ ކައުންސިލުން ކުރި އިޢުލާނުގައި ބުނެފައިވަނީ ހުއްދަނުނަގާ އެއްވެސް ކަހަލަ ކެމްޕޭނާ ގުޅޭ އިސްތިހާރެއް، މާލެ ސިޓީގެ މަގުތަކުގައި ނުވަތަ އެއްވެސް އާންމު ތަނެއްގައި ހިއްޕުމަކީ ނުވަތަ އެކަމާ ގުޅޭ ބެނާ ދެމުމަކީ މަނާކަމެއް ކަމަށެވެ.
އަދި ހުއްދަނެތި އިސްތިހާރު ހިއްޕާ ނުވަތަ ބެނާ ދަމާ ފަރާތްތައް ޖޫރިމަނާކުރެވޭނެ ކަމަށްވެސް ބަޔާނުގައިވެއެވެ.
ހުއްދަނެތި ހިއްޕާ ކެމްޕޭނާ ގުޅުންހުރި އިސްތިހާރު ނުވަތަ ދަމާ ބެނާތައް ކައުންސިލްގެ ބެލުމުގެ ދަށުން ވަގުތުން ނަގާ ނައްތާލެވޭނެކަމަށް އަދި، މިހެން ނައްތާލެވޭ އެއްވެސް އެއްޗަކަށް ކައުންސިލުން ޒިންމާނުވާނޭކަމަށްވެސް އިއުލާނުގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
