ކުރީގެ ރައީސުލްޖުމްހޫރިއްޔާ އަދި އިދިކޮޅު އިއްތިހާދުގެ ލީޑަރު ރައީސް ޔާމީނަށް އިއްވި ހުކުމުގެ ރިޕޯޓު އަދިވެސް ނުލިބުމަކީ، އެމަނިކުފާނަށް އިއްވޯ ހަރާން ހުކުމެއްކަން ދޭހަކޮށްދޭ އަލިގަދަ ހެއްކެއް ކަމަށް ޕީއެންސީގެ ނައިބު ރައީސް އަދި ހުޅުމާލެ ދާއިރާގެ ކައުންސިލް މެމްބަރު އިބްރާހިމް ޝުޖާއު ވިދާޅުވެއްޖެއެވެ.

ޝުޖާއު މިހެން ވިދާޅުވީ، ޔާމީނަށް އިއްވި ހުކުމް އަދިވެސް ނުލިބޭތީއާއި ހުކުމްގެ ވީޑިއޯ، ކްރިމިނަލް ކޯޓުގެ ޔޫޓިއުބް ޗެނަލްއިން ޑިލިޓްކޮށްލާފައި ވާތީ ޔާމީންގެ ލޯޔަރުންގެ ޓީމާއެކު، ލީޑަރޝިޕް ކްރިމިނަލް ކޯޓު ސަރަހައްދުގައި ހަރަކާތްތެރިވަމުން، ފޯނުން ވާހަކަ ދައްކަވަމުންނެވެ.

ޝުޖާއި ވިދާޅުވީ، އިދިކޮޅު އިއްތިހާދުން މި ހުކުމަށް ވަރަށް ބޮޑެތި ތުހުމަތުތައް ކުރާ ކަމަށެވެ.

"ފުރަތަމަ ކަމަކަށް، މީ ހަރާން ހުކުމެއް. މި ހުކުމަކީ ފަނޑިޔާރު ޝަކީލު ލިޔުނު ހުކުމެއް ނޫންކަން އަޅުގަނޑުމެންނަށް ކަށަވަރުގެ ޔަގީންވޭ. މީގެ ފުރިހަަމަ ދިރާސާއެއް އަޅުގަނޑުމެން މިދަނީ ކުރަމުން. ފަނޑިޔާރު ކޯޓުތެރޭގަ ރަހީނު ކޮށްގެން ގެންގުޅުނުކަމުގެ ތުހުމަތު އަޅުގަނޑުމެން އެބަ ކުރުން. އެހެންވީމަ އަޅުގަނޑުމެންނަށް މި ލިބޭ މައުލޫމާތުތައް ސައްހަ ކުރުމުގެ މަސައްކަތް އަޅުގަނޑުމެން ވަރަށް ފުޅާ ދާއިރާއެއްގަ އެބަ ކުރަން. ރޭވެސް އަޅުގަނޑުމެން މި މަަސައްކަތުގަ އުޅުނިން. ސިފައިންގެ ދެ ބޭކަލަކު ވަކި ރިޕޯޓެއް ހިއްޕަވައިގެން އަހިސް، އެ އަޅުގަނޑުމެން މި ގަބޫލު ކުރަނީ ހަރާން ހުކުމެއް ކަމަށް، ފަނޑިޔާރު އަތަށް ހުކުމެއް ދެއްވައިގެން އިއްވިކަމަށް އަޅުގަނޑުމެން ތުހުމަރު ކުރަނީ،" ޝުޖާއު ވިދާޅުވިއެވެ.

އެހެންކަމުން، އެކަންކަން ވަރަށް ގާތުން ބަލަމުން ދާކަން ފާހަގަ ކުރައްވައި ޝުޖާއު ވިދާޅުވީ، ކޯޓު ތެރެއަށް ވަނީ ކޮން ބައެއް ކަމަާއި، ސިފައިންގެ ދެ ބޭކަލަކު މީގެ ތެރޭގައި ޝާމިލުވާކަމާއި، އެބަޔަކު ހޯދުމުގެ މަސައްކަތްވެސް ކުރަމުން ދާކަމަށެވެ.

"މީ ހަރާން ހުކުމެއްކަން ދޭހަކޮށްދޭ އަލިގަދަ ހެއްކެއް ނޫންތޯ، ދިވެހިރާއްޖޭގެ ޒަމާންތަކެއް ވަންދެން ޖުޑީޝަލް ދާއިރާގަ ހަމަ ހުކުންތައް ކުރަމުން ގެންދޭ ކޯޓުތަކުގަ. ހުކުމް ކުރުމާއެކު ރިޕޯޓު ލިބޭ އެއްޗެކޭ އެއަކީ،" ސުޕްރިމް ކޯޓުގެ އުސޫލުތަކާ ގަވާއިދުތަކަށްވެސް ރިއާޔަތް ކުރަމުން ޝުޖާއު ވިދާޅުވިއެވެ.

އޭނާ ވިދާޅުވީ، ހުކުމް އިއްވީއްސުރެން، ރޭ ދަންވަރު ވަންދެން ހުކުމުގެ ރިޕޯޓު ހޯދުމަށް ލީޑާރޝިޕް ޓީމުން ކްރިމިނަލް ކޯޓުގައި ތިބި ކަމަށާއި، ޖަލުގައި އޮންނަ މީހަކަށް އެންމެ ދުވަހެއްވެސް އެއީ އަނިޔާއެއް ކަމަށެވެ.

ޔާމީނަކީ ރާއްޖޭގެ ލައްކައަަކަށްވުރެ ގިނަ މީހުން ތަމްސީލުކުރާ ރިޔާސީ ކެނޑިޑޭޓް ކަމަށް ވުމުން، އެމަނިކުފާނު ޖަލުގައި އޮންނަ ކޮންމެ ދުވަހަކީ، އެ އެއްލައްކައަށްވުރެ ގިނަ މީހުންނަށް ލިބޭ ވަރަށް ބޮޑު އަނިޔާއެެއް ކަމަށް ޝުޖާއު ވިދާޅުވިއެވެ.

ހުކުމުގެ ރިޕޯޓު ލަސްވާ ސަބަބެއް ކަމަށް ޝުޖާއު ތުހުމަތު ކުރެއްވީ، ފަނޑިޔާރު ޝަކީލު ނުލިޔާ ހުކުމެއް އޭނަ އިއްވަން ޖެހުމުން ކަމަށެވެ. އެހެންވީމަ ތުހުމަތު ކުރަނީ، ޔާމީނަށް ކުރީ ހަރާން ހުކުމެއް ކަމަށް ޝުޖާއު ވިދާޅުވިއެވެ.

އޭނާ ވިދާޅުވީ، މި މައްސަލަ އިސްތިއުނާފަށް ލެވޭނީވެސް ހުކުމުގެ ރިޕޯޓު ލިބިގެން ކަމަށެވެ.