ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރާއްޖޭގައި ކޯވިޑް ފެތުރުން ކޮންޓްރޯލުކޮށް އެ ހާލަތުގައި އިގްތިސާދު މެނޭޖުކުރިގޮތް ދުނިޔޭގެ ޔުނިވަސިޓީތަކުން ދިރާސާކުރަން ފަށައިފިކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) ވިދާޅުވެއްޖެ އެވެ. 

މަވޯޓާ މިފަދައިން ވިދާޅުވެފައިވަނީ އެމްޑީޕީގެ ޕްރައިމަރީގައި ރައީސް ސޯލިހުގެ ކެމްޕޭނު ރަސްމީކޮށް ފެއްޓެވުމަށް ބޭއްވި ޖަލްސާއެއްގައި ވާހަކަދައްކަވަމުންނެވެ. 

ޝަރީފް ވިދާޅުވީ ދުނިޔޭގެ އެތައް ގައުމެއް ކޯވިޑްގެ ބަލިމަޑުކަމުން އަރައި ނުގަނެވި މިއަދުވެސް ދުވަސްތައް ގުނަމުންދާކަމަށެވެ. އަދި ކޯވިޑާއި ގުޅިގެން ކުރިމަތިވި އިގްތިސާދީ ކާރިސާގައި ފަންސާސް އެތައް ގައުމެއް ބަނގުރޫޓުވެފައިވާ ކަމަށެވެ. 

Advertisement

ދިވެހިރާއްޖެއަކީވެސް ކޯވިޑްގެ ސަބަބުން ބަނގުރޫޓުވެދާނެކަމަށް ލަފާކޮށް ނެރެފައިވާ ލިސްޓުގައި ހިމެނެ ގައުމަކަށް ވީނަމަވެސް، ރައީސް ސޯލިހުގެ ސަރުކާރުން ރައްޔިތުންނަށް ކޯވިޑްގެ ދަތިކަން އިހުސާސް ވިޔަ ނުދެއްވާ ކޯވިޑް މެނޭޖު ކުރައްވާފައިވާކަމަށް ޝަރީފް ވިދާޅުވިއެވެ. 

އެމަނިކުފާނަށް އެކަން ކުރެއްވުނީ އެމަނިކުފާނުގެ ހިކުމަތްތެރިކަމުންކަމަށާއި، ދުނިޔޭގެ ޔުނިވާސިޓީތަކުން ރައީސް ސޯލިހު އެކަން ކުރެއްވި ގޮތް ދިރާސާ ކުރައްވަމުން ދާކަމަށް ޝަރީފް ވިދާޅުވިއެވެ. 

ޝަރީފް ވިދާޅުވީ ކޯވިޑްގެ ދަތިހާލުގައިވެސް ހުރިހާ މުވައްޒަފުންނަށް މުސާރަދީފައިވާކަމަށެވެ. އަދި އެއްވެސް ގެއަކުން ކަރަންޓު ކަނޑާލާފައި ނުވާކަމަށެވެ.

އެހެންކަމުން ހަމައެކަނި އެ ސަބަބަށްޓަކައިވެސް ރައީސް ސޯލިހަށް ދެވަނަ ދައުރެއް ދޭން ޖެހޭކަމަށް އޭނާ ވިދާޅުވިއެވެ.