ޖަލުގައި ހުކުމް ތަންފީޒު ކުރަމުންދާ ގައިދީންނާ ބައްދަލުކުރެވޭނެ އާއިލާ މެމްބަރުންގެ އަދަދު އިތުރު ކޮށްފިއެވެ.
ގައިދީންނާ ބައްދަލު ކުރެވޭނެ މީހުންގެ އުސޫލަށް އިސްލާހު ގެނުމާއެކު، ކުރިއަށްވުރެ ގިނަ އާއިލާ މެމްބަރުންނަށް ގައިދީންނާ ބައްދަލު ކުރެވޭނެއެވެ.
އެގޮތުން، އާ އިސްލާހާއެކު، ގައިދީންގެ ބޮޑު ދައިތައާއި ބޭބެ، އަދި އެއްބަނޑު މީހުންނާއި އެއްބަފާ މީހުންނާއި އެމީހުންގެ ދަރިންނަށް ވެސް ގައިދީންނާ ބައްދަލު ކުރެވޭނެއެވެ.
އޭގެ އިތުރަށް ދޮން ދަރިންނާއި ދޮން ކާފަ އަދި މާމަގެ އިތުރަށް ޝަރުއީގޮތުން ބެލެނެވެރިކަން ލިބިފައިވާ މީހުންނަށް ވެސް ގައިދީންނާ ބައްދަލުކުރެވޭނެ ކަމަށް އާ އިސްލާހުގައިވެއެވެ.
ޖަލުގައި ހުކުމް ތަންފީޒު ކުރަމުންދާ ގައިދީންނާ ބައްދަލުކުރެވޭނެ މީހުންގެ ކުރީގެ އުސޫލުގައި ވާގޮތުން، ފުލުހުންގެ ކަސްޓޮޑިއަލް ޖަލުތަކުގައި ތިބޭ މީހުންނާ ބައްދަލު ކުރެވޭނީ ހަމައެކަނި މަންމަ، ބައްޕަ، އަނބިމީހާ ނުވަތަ ފިރިމީހާ އާއި އެއްބަނޑު އެއްބަފާ މީހުންނާއި މާމަ އަދި ކާފަ ދަރިންނާއި މާމަ އަދި ކާފައަށެވެ.
Advertisement
This content is created and paid for by advertisers and does not involve Voice Journalists
