ޑްރޯން އެރުވުމުގެ ތިންދުވަސް ކުރިން ހުއްދައަށް އެދޭ ފޯމު ހުށަހަޅަން އެމްއެންޑީއެފުއިން އެދިއްޖެއެވެ.
އެމްއެންޑީއެފްއިން ބުނީ، ޑްރޯން އުދުއްސުމުގެ ހުއްދަ ދިނުމުގައި ސަލާމަތީގޮތުން ބަލަންޖެހޭ ކަންކަން ބެލުމަށް ވަގުތު ބޭނުންވާތީ، ޑްރޯން އެރުވުމުގެ ހުއްދައަށް އެދި ފޯމު ހުށަހަޅާއިރު ޑްރޯން އޮޕަރޭޓްކުރަން ބޭނުންވާ ތާރީޚުގެ މަދުވެގެން ރަސްމީ ތިން ދުވަސް ކުރިން ފޯމު ހުށަހަޅަން އެދޭ ކަމަށެވެ.
ޑްރޯން އުދުއްސުމުގެ ހުއްދަ އަށް އެދި މި މިނިސްޓްރީއަށް ހުށަހަޅާ ފޯމު އިސްލާޙު ކުރެވި، މިނިސްޓްރީގެ ވެބްސައިޓުގައި ޝާއިޢު ކުރެވިފައިވާކަމަށް އެމްއެންޑީއެފްއިން ބުންޏެވެ.
މާލޭގެ ރަސްފަންނު ފިޔަވައި އެހެން ސަރަހައްދުތަކުގައި ޑްރޯން އޮޕަރޭޓުކުރެވެނީ އެމްއެެންޑީއެފްގެ ހުއްދައެއް އޮވެގެންނެވެ. 2016 ވަނަ އަހަރުން ފެށިގެން މާލެ ސަރަހައްދުގައި ޑްރޯން އޮޕަރޭޓުކުރުމަށް އެމްއެންޑީއެފްގެ ހުއްދައެއް ނެގުން ލާޒިމުކުރީ އެއާޕޯޓެއް އޮތް ސަރަހައްދެއްގައި ޑްރޯން އޮޕަރޭޓުކުރުމުން ނުރައްކާތެރި ހާދިސާއެއް ހިނގައިފާނެތީއެވެ.
ޓްރާންސްޕޯޓް މިނިސްޓްރީން މިފަދަ ވިސްނުމަކަށް ގޮސްފައިވާކަން ހާމަކޮށްފައިވާއިރު، މި އަހަރުގެ އޭޕްރީލް މަހުގައި، ޓީއެމްއޭ އަދި މަންޓާއެއާގެ ފްލައިޓެއް ހުޅުމާލެ މަތިން ދަނިކޮށް ވަރަށް ކައިރިން ވީޑިއޯއެއް ކުރި މަންޒަރު މީސްމީޑިއާގައި އާންމުވުމާ ގުޅިގެން އެ މައްސަލަ ވަރަށް ހޫނުވެގެން ދިޔަކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
