އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށްވެސް ވެރިކަމަށް އާދެވޭނީ ކޯލިޝަނެއްގެ ތެރެއިންކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު ވިދާޅުވެއްޖެ އެވެ.
ޝަރީފު މިފަދައިން ވިދާޅުވެފައިވަނީ ދުވަހަކުވެސް އިންތިޚާބެއްގައި ނާކާމިޔާބީއާއި ކުރިމަތިލާން ޖެހިވަޑައި ނުގަންނަވާކަމަށް ނަޝީދު ވިދާޅުވުމާއި ގުޅިގެން ނަޝީދަށް ރައްދުދެއްވާ ކުރެއްވި ޓްވީޓެއްގައެވެ.
އެގޮތުން ޝަރީފު ވިދާޅުވީ ދުވަހަކުވެސް ނާކާމިޔާބީއަކާއި ކުރިމަތިލާން ޖެހިވަޑައި ނުގަންނަވާކަމަށް ވިދާޅުވި ނަމަވެސް ކޯލިޝަނާއި ނުލާ ނަޝީދަށްވެސް ކާމިޔާބީއެއް ހޯއްދެވިފައި ނުވާކަމަށެވެ. އަދި ދެން ވެސް ކޯލިޝަނާއި ނުލާ ކާމިޔާބުވާތަން ފެނިނުލައްވާކަމަށެވެ.
ޝަރީފު ވިދާޅުވީ 2008 ވަނަ އަހަރުގެ ރިޔާސީ އިންތިޚާބުގައި އެމްޑީީޕީގެ ރިޔާސީ ކެންޑިޑޭޓުގެ ގޮތުގައި ނިކުމެވަޑައިގެން ނަޝީދަށް ލިބިލެއްވީ އެންމެ 25 އިންސައްތަކަމަށެވެ. އެފަހަރު ނަޝީދަށް ވެރިކަމަށް އާދެވުނީ ކޯލިޝަނެއްގެ ތެރެއިންކަން ޝަރީފު ވަނީ ހަނދާންކޮށްދެއްވާފަ އެވެ.
އެމްޑީޕީގެ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ވާދަކުރައްވަން ނަޝީދު ނިކުމެވަޑައިގެން ހުންނެވިއިރު، ނަޝީދަށް ޕްރައިމަރީ ކާމިޔާބުވެއްޖެނަމަ އެނާ އާ އެކު އެއްވެސް ސިޔާސީ ޕާޓީއަކުން ކޯލިޝަން ހަދަން ބޭނުން ނުވާނެކަމަށް ރައީސް ސޯލިހުގެ ވަފާދާރުން ގެންދަވަނީ ވިދާޅުވަމުންނެވެ.
ނަޝީދަކީ ކޯލިޝަން ދަމަހައްޓަން އެނގިވަޑައިގަންނަވާ ބޭފުޅަކަށް ނުވާތީ، އެމްޑީޕީއަށް އެންމެ ފައިދާ ބޮޑު ގޮތަކީ ގުޅިގެން މަސައްކަތް ކުރަން ދަންނަ ލީޑަރެއް އިޚްތިޔާރު ކުރުންކަމަށާއި، އެމްޑީޕީގެ ވެރިކަން ދެމެހެއްޓޭނީ ރައީސް ސޯލިހަށް ދެވަނަ ދައުރެއް ދީގެންކަމަށް އެމަނިކުފާނަށް ތާއީދުކުރައްވާ މެމްބަރުން ގެންދަވަނީ ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists
