ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކުގެ ޝަރީއަތް ހިންގުމަށް ކުރީގެ ނައިބުރައީސް އަހުމަދު އަދީބުގެ ގާނޫނީ ވަކީލެއްކަމަށްވާ އަލީ ނަދީމް އައްޔަން ކުރެއްވުމުން ފަނޑިޔާރު އެ މައްސަލައިން ތަނާޒުލްވުމަށް ދިފާއީ ވަކީލުން އެދިވަޑައިގެންފި އެވެ.
ފުއްގިރި މައްސަލަ ކުރިއަށް ގެންދިއުމަށް ކްރިމިނަލް ކޯޓުގެ ފަނޑިޔާރު އަލީ ނަދީމާއި ހަވާލުކުރައްވާފައިވަނީ އެ މައްސަލަ މީގެ ކުރިން ބައްލަވަމުން ގެންދެވި ކްރިމިނަލް ކޯޓުގެ އިސް ފަނޑިޔާރު އަހުމަދު ޝަކީލް އެ މައްސަލައިން ތަނާޒުލްވެ ވަޑައިގަތުމާއި ގުޅިގެންނެވެ.
ކްރިމިނަލް ކޯޓުގައި މިއަދު ކުރިޔަށް ދިޔަ އަޑުއެހުމަކީ ނަދީމް ޝަރީއަތްކުރެއްވި ފުރަތަމަ މަޖިލީހެވެ.
ނަދީމްއަކީ މީގެ ކުރިން އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ އަހުމަދު އަދީބުގެ ލޯޔަރެއްގެ ގޮތުގައި ހުންނެވި ބޭފުޅަކަށްވާތީ މިއަދުގެ އަޑުއެހުމުގައި ދިފާއީ ވަކީލުން ވަނީ ފަނޑިޔާރު ނަދީމް އެ މައްސަލައިން ތަނާޒުލްވުމަށް ހުށައަޅުއްވާފައެވެ.
އަދީބުގެ ވަކީލެއްގެ ގޮތުގައި ހުންނެވި ބޭފުޅަކު އެމްއެމްޕީއާރުސިއާއި ގުޅުން ހުރި އެ މައްސަލައިގެ ފަނޑިޔާރެއްގެ ގޮތުގައި ހުންނެވުމަކީ މަސްލަހަތު ފުށޫއަރާނެ ކަމެއްކަން ދިފާއީ ވަކީލުން ފާހަގަކުރެއްވި އެވެ.
ދިފާއީ ވަކީލުންގެ އިއުތިރާޒާއި ގުޅިގެން ފަނޑިޔާރު ނަދީމު ވިދާޅުވީ، އެމަނިކުފާނު އަދީބުގެ ވަކީލެއްގެ ގޮތުގައި މަސައްކަތްޕުޅު ކުރެއްވީ މީގެ 7 އަހަރު ކުރިންކަމަށެވެ. އެއީ ބަންދު މައްސަލައެއްގައި ކަމަށް ވުމުންނާއި، އެއްވެސް ކުށަކާ ގުޅިގެން އަދީބަށް ގާނޫނީ ލަފާދީފައި ނުވާތީ ތަނާޒުލްވާން ޖެހޭ ފަދަ ހާލަތެއް އޮތް ކަމަށް ދެކެވަޑައިނުގަންނަވާ ކަމަށް ގާޒީ ވަނީ ވިދާޅުވެފައެވެ.
ކުރީގެ ނައިބުރައީސް އަހުމަދު އަދީބު ކޯޓުން ނިކުމެވަޑައިގަންނަވަނީ
ފުއްގިރި މައްސަލައިން ފަނޑިޔާރު ނަދީމް ނަތާޒުލްވުމަށް ދިފާއީ ވަކީލުން އެދިފައިވަނީ އެ މައްސަލައިގައި ހިމެނޭ އަހުމަދު ކުރިކް ރިޒާ މީގެ ކުރިން އައްޔަން ކުރެއްވި ގާނޫނީ ވަކީލަކީ ޒިޔަތުގެ ވަކީލެއްގެ ގޮތުގައި ހަރަކާތްތެރިވެފައިވާ ފަރާތެއްކަން ފާހަގަކޮށް ދައުލަތުން މައްސަލަ ޖައްސާފައިވާތީއެވެ.
އޭރު މައްސަލަ ބެއްލެވި އިސްގާޒީ ޝަކީލު ނިންމެވީ ގާނޫނީ ވަކީލު ޔާމީން މައްސަލައިގައި ތަނާޒުލްވާން ޖެހޭ ކަމަށެވެ. އެހެންކަމަށް ވުމުން، ގާޒީ ނަދީމް ވެސް މައްސަލައިން ތަނާޒުލްވާން ޖެހޭ ކަމަށް ދިފާއީ ވަކީލުން ވަނީ ވިދާޅުވެފައެވެ.
އެ މައްސަލައާއި ގުޅޭގޮތުން ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވީ މި މައްސަލައިގައި އަދީބަށް ލުއިތަކެއްދީ އެއްބަސްވުންތަކެއް ވެފައިވާއިރު، އޭނާގެ ވަކީލެއްގެ ގޮތުގައި މަސައްކަތްކުރެއްވި ވަކީލަކު ޝަރީއަތް ކުރެއްވުމުން އިންސާފުވެރި ޝަރީއަތެއް ލިބޭނެ ކަމާ މެދު ޝައްކު އުފެދޭ ކަމަށެވެ. އަދި ފަނޑިޔާރު ވަކި ފަރާތަކަށް ބުރަވުމުގެ ފުުރުސަތު އޮތްކަމަށެވެ.
މިއަދުގެ އަޑުއެހުން ނިންމާލާފައިވަނީ އެ މައްސަލަ ދިރާސާކުރުމަށާއި، މަޖިލީހަށް ހުށައެޅި ކަންކަމަށް ގޮތެއް ނިންމުމަށް ގާޒީ ވަގުތުކޮޅެއް ބޭނުންވަކަމަށް ވިދާޅުވެ އިތުރު މަޖިލީހެއް ތާވަލް ކުރާނެކަން އަނަގާވާފައެވެ. އެހެން ނަމަވެސް ދެން އެ މައްސަލައިގެ އަޑުއެހުމެއް އޮންނާނެ ވަކި ތާރީހެއް ގާޒީ ވިދާޅުވެފައެއް ނުވެއެވެ.
ރ. ފުއްގިރި މައްސަލައިގެ ޝަރީއަތްވެސް ލައިވްކޮށްދިނުމަށް ރައީސް ޔާމީންގެ ފަރާތްޕުޅުން ވަނީ އެދިފައެވެ. އެހެން ނަމަވެސް މިހާތަނަށް އެކަމަށް ވަކިގޮތެއް ޝަރިއަތުން ނިންމާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
