މާލެ ސިޓީ ކައުންސިލްގެ މި ކުރިއަށްދާ ދައުރުގައި، މިވީ 18 މަސްތެރޭ ކައުންސިލްގެ އާމްދަނީ އިން 10 މިލިއަން މިސްކިތް ތަކަށް ޚަރަދުކޮށްފައިވާ ކަމަށް ސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
މާލޭގައި ހުރި މިސްކިތްތައް އަންނަ ރަމަޟާން މަހަށް މަރާމާތު ކުރުމަށް ފަންޑް ހޯދުމަށް ޓެލެތޯނެއް ބާއްވަން ސިޓީ ކައުންސިލުން ނިންމުމާއި ގުޅިގެން ބައެއް ފަރާތްތަކުން އަންނަނީ އެކަމަށް ފާޑުކިޔަމުންނެވެ.
އެ ފަރާތްތަކުގެ ފާޑުކިޔުންތަކަށް ރައްދު ދެއްވައި މޭޔަރު ކުރެއްވި ޓްވީޓެއްގައި ވިދާޅުވީ، މާލެ ސިޓީ ކައުންސިލުން މިވީ 18 މަސްތެރޭގައި ސިޓީ ކައުންސިލްގެ ބެލުމުގެ ދަށުގައި ހުރި މިސްކިތް ތައް ބެލެހެއްޓުމަށާއި މަރާމާތު ކުރުމަށް ކައުންސިލްގެ އާމްދަނީއިން 10 މިލިއަން ރުފިޔާ ޚަރަދު ކޮށްފައިވާ ކަމަށެވެ.
އަދި ސަރުކާރުން މިސްކިތް ތަކުގެ ބެޖެޓަށް ދިނީ އެންމެ 1 މިލިއަން ކަން ފާހަގަކުރައްވައި މުއިއްޒު ވިދާޅުވީ، ފަންޑު ހޯދުމަށް ޓެލެތޯން ބާއްވަނީ ކުރިއަށް އޮތް ރޯދަމަހަށް ނިންމަންޖެހޭ ބައެއް އިތުރު ކަންކަން ހުރުމުން ކަމަށެވެ.
މާލެ ސިޓީ ކައުންސިލުން މިސްކިތްތައް މަރާމާތު ކުރަން ފަންޑް ހޯދުމަށް ޚާއްސަ ޙަރަކާތެއްގެ ގޮތުގައި ޓެލެތޯންއެއް ބޭއްވުމަށް ނިންމާފައި ވާއިރު، އެ ކައުންސިލުން ބުނީ މިސްކިތްތަކުގޭލެ މަސައްކަތަކީ ސިޓީ ކައުންސިލުން އެންމެ އިސްކަމެއް ދީގެން ކުރަމުން އަންނަ ކަން ކަމަށެވެ.
އެހެން ކަމުން އެތަންތަނުގެ މެއިންޓެއިން މަސައްކަތްތަކާއި، މަރާމާތުތަކަށް ބޮޑެތި ހޭދައެއް ކުރަންޖެހޭއިރު، ކައުންސިލުގެ ބަޖެޓުން މިކަން އެންމެ އެދެވޭ ގޮތަށް ނުކުރެވޭ ކަމަށާއި ޓެލެތޯންގެ ސަބަބުން ކުރިއަށް އޮތް ރަމަޟާން މަހަށް، މިސްކިތްތަކުގައި ކުރަންޖެހޭ މަރާމާތުތައް ކުރުމަށް މަގުފަހިވެގެންދާނެ ކަމަށެވެ.
ޓެލެތޯން ބާއްވަން ނިންމީ އާންމުން އަދި ވިޔަފާރިވެރިންގެ އެހީއާ އެކު މިސްކިތްތައް މަރާމާތުކޮށް ބެލެހެއްޓުމައްޓަކައި ކަމަށް ސިޓީ ކައުންސިލުން ހާމަކުރެއެވެ.
މިސްކިތްތައް ބެލެހެއްޓުމަކީ ކައުންސިލްތަކަށް އޮންނަ ޒިންމާ އެކެވެ. މާލެ ސިޓީ ކައުންސިލުން މާލެ އާއި ވިލިމާލޭގައި 34 މިސްކިތެއް ބަލަހައްޓަމުން ގެންދެ އެެވެ.
Advertisement
This content is created and paid for by advertisers and does not involve Voice Journalists
