މިސްކިތްތަކުގެ އާބާތުރަ ފިލުވާ މިސްކިތްތައް މަރާމާތުކުރުމަށް މާލޭ ސިޓީ ކައުންސިލުން ކުރިއަށް ގެންދާ "ޗާލު މިސްކިތް" ފަންޑަށް އާންމުންގެ ބޮޑު ތަރުހީބެއް ލިބެމުންދާކަމަށާއި، އެ ހަރަކާތް ފެއްޓިތާ 24 ގަޑިއިރުގެ ތެރޭގައި ތިން ލައްކަ ރުފިޔާއަށްވުރެ ގިނައިން ލިބިފައިވާކަމަށް މާލޭ ސިޓީ ކައުންސިލުން ބުނެފިއެވެ.
މާލޭ ސިޓީ ކައުންސިލުން ބާއްވާ އެ ހަރަކާތާއި ގުޅިގެން އެ ކައުންސިލުން ބުނީ ސިޓީ ކައުންސިލުން ހާމަކުރި ގޮތުގައި ފުރަތަމަ ދުވަސް ތެރޭގައި ޖުމްލަ 313،397 ރުފިޔާ ލިބިފައިވާކަމަށެވެ.
ދެ ދުވަހަށް ކުރިއަށް ގެންދާ މި ހަރަކާތަކީ މާލޭ ސިޓީގެ މިސްކިތްތަކުގެ އާބާތުރަ ފިލުވުމަށް ބޭނުންވާ ފައިސާ ހޯދުމަށް ކުރިއަށް ގެންދާ ހަރަކާތެކެވެ.
މާލޭ ސިޓީ ކައުންސިލުން ބުނީ މިސްކިތަތްކުގެ މަރާމާތަށް ބޭނުންވާ އެކަށީގެންވާ ބަޖެޓު ސަރުކާރުން ދީފައި ނުވާތީ، މިސްކިތްތައް ބަލަހައްޓާ މަރާމާތުކުރުމަށް އާންމުންެގ އެހީތެރިކަން ބޭނުންވާކަމަށެވެ.
މިހާތަނަށް އެ ހަރަކާތަށް ލިބެމުންދާ ތަރުހީބަށް މާލޭ ސިޓީ ކައުންސިލުން ޝުކުރު އަދާކުރާ ކަމަށާއި، ކުރިއަށް އޮތް ތަނުގައިވެސް ވެދެއްވުނު އެހީތެރިކަމަށް އެ ފަންޑަށް ފޯރުކޮށްދިނުމަށް މާލޭ ސިޓީ ކައުންސިލުން ވަނީ އެދިފަ އެވެ.
Advertisement
This content is created and paid for by advertisers and does not involve Voice Journalists
