ތިން އަހަރު މިސްކިތް މަރާމާތަށް މިނިސްޓްރީން ދިނީ 1 މިލިއަން ރުފިޔާ ކަމަށް މާލޭ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު މިހެން ވިދާޅުވީ، މިސްކިތްތައް މަރާމާތު ކުރުމަށް ފަންޑު ހޯދުމަށް ސިޓީ ކައުންސިލުން ހަރަކާތްތައް ހިންގަމުންދާ ދަނޑިވަޅެއްގައި، އެކަމަށް ސަރުކާރުން ބަޖެޓު ނުދެނީތޯ އެކި ފަރާތްތަކުން ސުވާލު އުފައްދަމުންދާ ދަނޑިވަޅެއްގައެވެ.

މުއިއްޒު ވިދާޅުވީ، 2020، 2021 އަދި 2022 ވަނަ އަހަރަށް މިސްކިތްތައް މަރާމާރު ކުރުމަށް ދީފައި ވަނީ އެއް މިލިއަން ރުފިޔާ ކަމަށެވެ.

މީގެ އިތުރުން މުއިއްޒު ވިދާޅުވީ، ދެ މިލިއަންއަށް ރުފިޔާ އަށްވާ މަސައްކަތް ކޮށްފައި ބިލް ފޮނުވީމަ ފައިސާ ދޭނެ ކަމަށް މިދިޔަ އަހަރު ސަރުކާރުން ބުނި ކަމަށެވެ. ނަމަވެސް އެއީ މާލިއްޔަތު ގާނޫނާ ގަވާއިދުން ހުއްދަ ކަމަކަށް ނުވާތީ އަދި ލާމަރުކަޒީ ގާނޫނު ތަން ދޭ ކަަމަކަށް ނުވާތީ ތަކުރާރުކޮށް އެތައް މީޓިންއެއްގައިވެސް، އެ 2 މިލިއަން ކައުންސިލް ބަޖެޓްއަށް ޖަމާކޮށްދެއްވަން ދެންނެވި ކަމަށާއި އޭރުން މަސައްކަތް ކުރާނެ ފަރާތްތައް ހޯދައިގެން މަސައްކަތް ކުރެވޭނެ ކަމަށްވެސް ދެންނެވިން ކަމަށް މުއިއްޒު ވިދާޅުވިއެވެ.

"ނެތް ބަޖެޓް އަކަށް މަސައްކަތް ކްރެޑިޓްއަށް ކޮށްފަ ރެއިންބަރސް ނުކުރެވޭނެ ކަމަށް. ތަކުރާރުކޮށް ދެންނެވީމަވެސް އެއްބަސްވެ ނުލެއްވި. އެހެންކަމުން ހުރިހާ ހަރަދެއް ކުރީ ކައުންސިލްއިން ހޯދާ އާމްދަނީ ފައިސާއިން" މުއިއްޒު ވިދާޅުވިއެވެ.

މި އަހަރުގެ ރަމަޟާން މަހަށް މާލެ ސަރަހައްދުގެ މިސްކިތްތައް މަރާމާތު ކުރުމަށް އެހީތެރިވުމަށް ޝައުގުވެރިވާ ފަރާތްތަކަށް އެފުރުސަތު ހޯދައިދިނުމަށް މާލެ ސިޓީ ކައުންސިލުން ވަނީ "ޗާލު މިސްކިތް"ގެ ނަމުގައި ހަރަކާތެއް ފަށާފައެވެ.

މާލެ ސިޓީ ކައުންސިލުން މިސްކިތްތައް މަރާމާތު ކުރަން ފަންޑް ހޯދުމަށް ހަރަކާތެއް ބޭއްވުމަށް ނިންމީ މިސްކިތްތަކަކީ ސިޓީ ކައުންސިލުން އެންމެ އިސްކަމެއް ދީގެން ކުރަމުން އަންނަ ކަމެއް ކަމަށްވުމާއެކު، މިސްކިތްތައް ކައުންސިލްއާއި ސަރުކާރުން ހަވާލުކުރީ މިސްކިތްތައް މަރާމާތު ކުރުމަށް އެކަށީގެންވާ ބަޖެޓަކާއި ނުލާ ކަމަށް ވުމުންނެވެ.

މާލެ ސިޓީ ކައުންސިލުގެ މީޑީއާ ގްރޫޕުގައި ނޫސްވެރިންނަށް މައުލޫމާތު ހިއްސާ ކުރައްވަމުން މޭޔަރު ވިދާޅުވީ 2021 އަދި 2022 ވަނަ އަހަރު ސަރުކާރުން މާލެ ސަރަހައްދުގެ މިސްކިތްތައް ބެލެހެއްޓުމަށް ހަމަޖައްސައިދީފައިވަނީ އެންމެ 1 މިލިއަން ރުފިޔާ ކަމަށާއި އޭގެ ބޭރުން މާލެ ސިޓީ ކައުންސިލުގެ އާމްދަނީ ބަޖެޓުން 10 މިލިއަން ރުފިޔާ މާލެ ސިޓީ ކައުންސިލުން މިސްކިތްތައް މަރާމާތު ކުރުމަށް ހަރަދުކޮށްފައިވާ ކަމަށެވެ.

މާލެ ސަރަހައްދުގެ މިސްކިތްތައް ބެލެހެއްޓުމަކީ ލާމަރުކަޒީ ގާނޫނުގެ ދަށުން މާލެ ސިޓީ ކައުންސިލުން ކުރަންޖެހޭ ކަމެކެވެ. އެގޮތުން މިވަގުތު ސިޓީ ކައުންސިލުން މާލެއާއި ވިލިމާލޭގައި 34 މިސްކިތެއް ބަލަހައްޓަމުން ގެންދެ އެވެ.