ބްރޯޑްކާސްޓިންގ ކޮމިޝަން (ބްރޮޑްކޮމް)ގެ ނައިބު ރައީސްކަމުގެ މަގާމުގައި ހުންނެވި އަހުމަދު ގައިސް އެ މަގާމުން އިސްތިއުފާ ދެއްވައިފިއެވެ.

ގައިސް މި މަގާމަށް އައްޔަނު ކޮށްފައި ވަނީ 2019 ވަނަ އަހަރުގެ ޑިސެމްބަރު މަހުގައެވެ.

އިސްތިއުފާއާ ގުޅިގެން ގައިސް "ވޮއިސް" އަށް ވިދާޅުވީ، އެ މަގާމުން އިސްތިއުފާ ދެއްވީ ސިޔާސީ މަސައްކަތަށް ވަގުތު ހުސްކުރަން ކަމަށެވެ.

Advertisement

މީގެ އިތުރުން ގައިސް ވިދާޅުވީ، އެމްޑީޕީގެ އެތެރޭގެ އިންތިހާބުގައި ރައީސް ޞާލިހުއަށް ކެމްޕޭން ކޮށްދެއްވާނެ ކަމަށާއި އަދި ރައީސް ޞާލިހަށް ރިޔާސީ އިންތިހާބު ކާމިޔާބު ކޮށްދިނުމަށް މަސައްކަތް ކޮށްދެއްވާނެ ކަމަށެވެ. އިސްތިއުފާ ދެއްވީ އެމަސައްކަތައް ގިނަ ވަގުތު ދިނުމަށްކަމަށް ގައިސް ވިދާޅުވެފައިވެއެވެ.

ގައިސްއަކީ އެމްޑީޕީގެ ޓިކެޓެއްގައި ގދ.އަތޮޅު ކައުންސިލްގައި އިންނެވި ބޭފުޅެކެވެ.

ބްރޯޑްކޮމްގައި މިހާރު ދެން ތިއްބަވަނީ ކޮމިޝަންގެ ރައީސް މަރިޔަމް ވަހީދާއާއި، މެންބަރު އަލީ ޔޫސުފްއާއި، މެންބަރު އާމިނަތު އަމީނާއާއި، މެންބަރު މުހައްމަދު ފަޒީން، މެންބަރު ޝިފްލާ އިބްރާހީމް އަދި މެންބަރު އަމްޖަދު ވަހީދެވެ.