ނީލަން ފިހާރައިގައި، މިއަދި ހެނދުނު ރޯވި އަލިފާނުގެ ހާދިސާއާ ގުޅިގެން މާލެ ސިޓީ ކައުންސިލުގެ 166 ބިދޭސީ މުވައްޒަފުންނަށް އަދިވެސް ވަގުތީ ބޯހިޔާވަހިކަން ހަމަނުޖެހޭ ކަމަށް މާލެ ސިޓީ ކައުންސިކުން ބުނެފިއެވެ.

އަލިފާނުގެ ހާދިސާގެ ސަބަބުން ވަގުތީ ބޯހިޔާވަހިކަން ދޭން ޖެހުނު މުވައްޒަފުން ވަގުތީގޮތުން މިހާރު ތިބީ އިމާދުއްދީން ސްކޫލްގައެވެ. 

މި ހާދިސާގައި އެއްވެސް މީހަކަށް އަނިޔާ ލިބިފައި ނުވިޔަސް، ނީލަން ފިހާރައިގެ އުތުރު ފަޅިން އިމާދުއްދިން ސްކޫލާ ދިމާއިން ފެތުރެމުންދިޔަ އަލިފާންގަނޑުގެ އަސަރު، މާލެ ސިޓީ ކައުންސިލުގެ ބިދޭސީ މުވައްޒަފުން ތިބި ތިން ބްލޮކަކަށް ވަނީ ކޮށްފައެވެ.

Advertisement

މިކަމާ ގުޅިގެން ސިޓީ ކައުންސިލުން "ވޮއިސް" އަށް ވިދާޅުވީ، އަދުވެސް ތިބީ އިމާދުއްދީން ސްކޫލުގައި ކަމަށާއި މިހާތަނަށް ދާއިމީ ބޯހިޔާވަހިކަމެއްވެސް އަދި ވަގުތީ ބޯހިޔާވަހިކަމެއް ވެސް ހަމަ ނުޖެހޭ ކަމަށެވެ.

" ބުނާކަން ނޭނގެ (ހަމަޖެހޭނެ އިރެއް). ހަމަ ސަރުކާރުގަ އެހީއަށް އެދިގެން މިއުޅެނީ،" ސިޓީ ކައުންސިލުން މަައުލޫމާތު ދިނެވެ.

އެކަމާ ގުޅިގެން ޑިޒާސްޓަރ މެނޭޖްމަންޓްއިންވެސް ދިނީ ހަމަ އެފަދަ ޖަވާބެކެވެ.

"އެ މަސައްކަތް ހަމަ ކުރިއަށް ދަނީ. އަދި ވަކިތަނެއް ހަމައެއް ނުޖެހޭ. އަދި ހަމަ އިމާދުއްދީން ސްކޫލުގަ ތިބީ،" ޑިޒާސްޓަރ އިން ބުންޏެވެ.

ޑިޒާސްޓަރއިން ބުނީ ވަގުތީ ބޯހިޔާވަހިކަން ހަމަޖެހޭނެ އިރެއް ބުނަން ނޭނގޭ ކަމަށާއި، ސިޓީ ކައުންސިލާ ގުޅިގެން އެކަމަށް މަސައްކަތް ކުރަމުންދާ ކަމަށެވެ.