ސަލްމާން މިސްކިތު އޭސީ މަރާމާތުކުރާ ޓީމް އާދިއްތަ ދުވަހު ރާއްޖެ އަންނާނެ ކަމަށް އިސްލާމިކް މިނިސްޓްރީން ބުނެފިއެވެ.
ސައޫދީ ރަސްގެފާނު ސަލްމާން ބިން ޢަބްދުލްޢަޒީޒުގެ ހިލޭ އެހީގައި ކުރީގެ ރައީސް، ޔާމީންގެ ސަރުކާރުން މާލޭގައި ޢިމާރާތްކޮށްފައިވާ ކިންގް ސަލްމާން މިސްކިތް ހުޅުވީ މިދިޔަ އަހަރުގެ އޭޕްރީލް މަހުގެ ތެރޭގައިއެވެ. ނަމަވެސް މިސްކިތް ހުޅުވިތާ ދެމަހެއްހާ ދުވަސް ފަހުން، އޭސީތަކުން ފިނިނުވާ މައްސަލަ ފެންމަތިވިއެވެ.
ހަތަރު އޭސީ ޔުނިޓް ހަރުކޮށްފައިވާ ސަލްމާން މިސްކިތުގައި މިހާރު ރަނގަޅަށް މަސައްކަތް ކުރަނީ އެންމެ ޔުނިޓެކެވެ.
ސަލްމާން މިސްކިތުގައި އޭސީ ހަރުކޮށްފައި ވަނީ ބޭރުގެ ކޮންޓްރެކްޓަރުން ކަމަށް ވުމާއެކު، ރާއްޖޭން އޭސީތައް މަރާމާތު ކުރުމުގެ މަސައްކަތް ވަނީ ނާކާމިޔާބުވެފައެވެ.
އެކަމާ ގުޅިގެން އިސްލާމިކް މިނިސްޓްރީން ބުނީ، އޭސީ ހެދުމަށް ބޭނުންވާ ސާމާނާއެކު، އޭސީ މަރާމާތު ކުރާ ޓެކްނިކަލް ޓީމު، މި މަހުގެ 15 ވަނަ ދުވަހު މާލެ އައުމަށް ހަމަޖެހިފައި ވާކަމަށެވެ.
"މާ ލަސްތަކެއް ނުވެ އޭސީ މައްސަލަ ހައްލު ވާނެ،" އިސްލާމިކް މިނިސްޓްރީން ބުންޏެވެ.
Advertisement
This content is created and paid for by advertisers and does not involve Voice Journalists
