ށ. ފޭދޫގެ ފާރެއްގައި "އިންޑިއާ އައުޓު" ސްޕްރޭކުރި އެ ރަށު ޒުވާނެއްކަމަށްވާ މުހައްމަދު ސަމާހު 4 މަހާއި 24 ދުވަހަށް ޖަލަށްލުމަށް ފޭދޫ މެޖިސްޓްރޭޓް ކޯޓުން ހުކުންކޮށްފި އެވެ.
އިންޑިއާ އައުޓު ކިޔުމާއި އެފަދައިން ޝުއޫރު ފާޅުކުރުމަކީ ޖިނާއީ ކުށެއްކަމަށް ކަނޑައެޅުމަށް މަޖިލީހަށް ވަނީ ހުޅައަޅާފައެވެ. އަދި އެފަދަ އަމަލުތަކަކީ ދޭދޭ ގައުމުތަކާއި މެދު ނަފްރަތު އުފެއްދުމުގެ އަމަލުތަކުގެ ގޮތުގައި ކަނޑައަޅާ، އެކަން ހުއްޓުވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ގަރާރެއްވެސް ނެރެފައެވެ.
އެހެން ނަމަވެސް އިންޑިއާ ސިފައިން ދިވެހިރާއްޖޭގައި ގާއިމުވުމާއި ދެކޮޅަށް ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުން ގެންދަނީ ޚިޔާލުފާޅުކުރަމުން ނެވެ.
އިންޑިއާ އައުޓު ޖަހާފައިވާ ދިދަ ތަކާއި ބެނާތައްވެސް އެހި ހިސާބުތަކުގައި ދަމަމުންދާއިރު، އިންޑިއާ އައުޓު ސްޕްރޭކުރި ޒުވާނެއްގެ މައްޗަށް 1 މަސް ދުވަހުގެ ޖަލުހުކުމެއް މީގެކުރިންވެސް ވަނީ އިއްވާފައެވެ.
ރާއްޖޭގެ މުހިންމު ސަރަހައްދުތަކުގައި އިންޑިއާ ސިފައިން ގާއިމުވެތިބީ ގަވައިދާއި ޚިލާފަށްކަމަށް އިދިކޮޅުން ގެންދަނީ ބުނަމުންނެވެ. އަދި ރައީސް ޔާމީން އަނބުރާ ވެރިކަމަށް ވަޑައިގެން، އިންޑިއާ ސިފައިން އަނބުރާ ފޮނުވާލާނެކަމުގެ ޔަގީންކަންވެސް ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
