ލޮލު ރޯގާ ފެތުރޭ މިންވަރު އިތުރުވާތީ، އެކަމަށް ސަމާލު ވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފިއެވެ.
އެޗްޕީއޭއިން އިއްޔެ ބުނީ، މި ދުވަސްވަރު ލޮލު ރޯގާ ޖެހިގެން ރިޕޯޓު ކުރާ މީހުންގެ އަދަދު އިތުރުވެފައި ވާކަމަށެވެ.
އެހެންކަމުން، ދުރާލާ ބަލީގެ އަލާމަތްތައް ދެނެގަނެ، ރައްކާތެރިކަމުގެ ފިޔަވަޅު އެޅުމަށް އެޗްޕީއޭއިން ވަނީ ހަނދާންކޮށްދީފައެވެ.
ވަރަށް ފަސޭހަކަމާއެކު ގައިން ގަޔަށް އަރާ މި ބަލި ޖެހުމުން ފެންނާނެ އަލާމާތްތަކުގެ ތެރޭގައި ހުން އައުމާއި ލޮލުން ފެން އައުމުގެ އިތުރުން ލޯ ހިރުވުން އަދި ލޯ ރަތްވުމާއި ލޮލުގައި މަޑުލުން ހިމެނެއެވެ.
ލޮލުރޯގާއިން ރައްކާތެރިވުމަށް އެޅޭނެ ފިޔަވަޅުތަކުގެ ތެރޭގައި، ގިނައިން ސައިބޯނިލައިގެން އަތް ދޮވުމާއި އާންމުކޮށް އަތްލާ ތަކެއްޗާއި، ތަންތަން ސާފު ކުރުން ހިމެނެއެވެ.
މީގެ އިތުރުން، ލޮލުގައި އަތްލުން، ނުވަތަ އުނގުޅުމުން ދުރުހެލިވާން ޖެހޭނެ ކަމަށާއި ބޭނުން ކޮށްފައިވާ ޓިޝޫ ފަދަ ތަކެތި ރައްކާތެރި ގޮތުގައި ނައްތާލަން ޖެހޭނެ ކަމަށް އެޗްޕީއޭއިން ބުނެއެވެ.
އެޗްޕީއޭއިން އިލްތިމާސް ކޮށްފައި ވަނީ، ލޮލު ރޯގާ ޖެހުމުން ލަސްނުކޮށް ޑޮކްޓަރަށް ދެއްކުމަށެވެ. އަދި މިއީ ވަރަށް ފަސޭހައިން ގައިން ގަޔަށް އަރާ ރޯގާއަކަށް ވާތީ، ބަލި ޖެހިފައިވާ މީހުން އާއްމުންގެ ތެރެއަށް ނުކުމެ ނޫޅުމަށް ވެސް އެޗްޕީއޭ އިން އިލްތިމާސްކުރެއެވެ.
Advertisement
This content is created and paid for by advertisers and does not involve Voice Journalists
