މިމަހު 9 ވަނަ ދުވަހު ބޮޑު އަލިފާނުގެ ހާދިސާއެއް ހިނގައި ބޭނުން ނުކުރެވޭ ވަރަށް އަނދައި ހުލިވި، ނީލަން ފިހާރަތައް، ދެން އެ ތަނުގައި ނުހިންގަން މާލެ ސިޓީ ކައުންސިލުން ނިންމައިފި އެވެ.
މިއަދު ބޭއްވުނު މާލެ ސިޓީ ކައުންސިލްގެ ހަތަރު ވަނަ ދައުރުގެ 84 ވަނަ ރަސްމީ ޖަލްސާ ގައި ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވަނީ މާލޭ އިންޑަސްޓްރިއަލް ވިލެޖަށް ނީލަން ފިހާރަ ހިންގުމަށް ހުށަހަޅުއްވާފައެވެ.
މި ހުށަހެޅުން ހުށަހަޅުއްވަމުން ޑރ. މުއިއްޒު ވިދާޅުވީ ނީލަން ފިހާރަތައް ހުރި ތަނުން ބަދަލު ކުރުމަކީ މީގެ ކުރިންވެސް އެ ކައުންސިލުން ނިންމައި، އެ އިދާރާއަށް ނެގެން އޮތް މިންވަރަކުން އެ ނިންމުމަށް އަމަލީ ސިފަ ގެނައުމުގެ މަސައްކަތްވެސް ކޮށްފައިވާ ކަމެއް ކަމަށެވެ.
އެގޮތުން 2021 ވަނަ އަހަރުގެ އޮގަސްޓު މަހުގެ 4 ވަނަ ދުވަހުގައި ބޭއްވުނު ކައުންސިލްގެ މި ދައުރުގެ 12 ވަނަ ރަސްމީ އާންމު ޖަލްސާގައި ނީލަން ފިހާރަ އެ ހުރި ތަނުން ބަދަލުކޮށް އެތަން މާލޭ އިންޑަސްޓްރިއަލް ވިލެޖަށް ބަދަލުކުރުމަށާއި، އެކަން ސަރުކާރުގެ ރަސްމީ އިދާރާތަކަށް އެންގުމަށް ކައުންސިލަރުންގެ އިއްތިފާގުން ނިންމި ކަން މޭޔަރު ފާހަގަކުރެއްވިއެވެ.
"ހަމަ އެ ދުވަހު ޕްލޭނިން މިނިސްޓްރީއަށް ސިޓީ ފޮނުވާފަ މިއޮތީ، މާލޭގެ ދެކުނު ފަރާތު ކުރީގެ އެއް ނަންބަރު ކުނި ކޮށި ހިމެނޭ ސަރަހައްދުގެ ފަޅުމައްޗަށް ވާގޮތަށް ހުންނަ ނީލަން ތަކެތި ވިއްކާ ސަރަހައްދު އިންޑަސްޓްރިއަލް ވިލެޖަށް ބަދަލުކުރުމަށް މި ކައުންސިލްގެ ރަސްމީ އާންމު ޖަލްސާއިން ނިންމި ކަމަށް،" މުއިއްޒު ވިދާޅުވި އެވެ.
މުއިއްޒު ވިދާޅުވީ އެ ސިޓީ ޕްލޭނިންގެ މިނިސްޓްރީއަށް ފޮނުވިއިރު، އެކަމާއި ގުޅޭ ޗާޓުވެސް ހިމަނައި ވަރަށް ތަފްސީލުކޮށް އެކަން ބަޔާން ކުރައްވާފައިވާނެކަމަށެވެ. އެއަށްފަހު މިހާރު އެއް އަހަރާއި 4 މަސް ވެފައިވާ ކަން ފާހަގަކުރައްވައި މުޢިއްޒު ވިދާޅުވީ އެ ދުވަހު އެ ހުއްދަ ދެއްވި ނަމަ، މިހާރު ހުންނާނީ ޒަމާނީ ފެންވަރަށް އެތަން ތައްޔާރުކޮށް ނިމިފައި ކަމަށެވެ.
މުއިއްޒު އިތުރަށް ވިދާޅުވީ ނީލަން ފިހާރަ އެނދި އިރު ހުރި ތަނުގައި ހިންގުމަކީ ޗޮއިސް އެއް ނޫން ކަމަށެވެ. އަދި އިންޑަސްޓްރިއަލް ވިލެޖުގައި ނީލަން ފިހާރަ ހިންގުމަށް އެދި ކައުންސިލުން ހުށަހެޅި ބިން މިހާރުވެސް އޮތީ ހުސްކޮށް ކަމަށް މުއިއްޒު ވިދާޅުވި އެވެ.
ނީލަން ފިހާރަ ތައް އިންޑަސްޓްރިއަލް ވިލެޖަށް ބަދަލު ކުރަން މޭޔަރ ހުށަހެޅުއްވި ހުށަހެޅުން ބައްދަލުމުގައި ބައިވެރިވި 11 މެންބަރުންގެ އިއްތިފާގުން ވަނީ ފަސްވެފައެވެ.
Advertisement
This content is created and paid for by advertisers and does not involve Voice Journalists
