ފުރަމާލޭގައި ކުނި އެޅުން މަނާ ސަރަހައްދުތައް ފާހަގަކުރުމަށް ނަންބޯޑުތައް ޖެހުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.
އެކަން ހާމަކުރައްވާ މާލޭ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވީ "ކުނިއެޅުން މަނާ" ޖަހާފައިވާ 100 ބޯޑު މާލޭގެ އެހި ހިސާބުތަކުގައި ހަރުކުރުމުގެ މަސައްކަތް މާލޭ ސިޓީ ކައުންސިލުން ފާށާފައިވާކަމަށެވެ.
އެހެން ނަމަވެސް ހަމައެކަނި ބޯޑުތައް ހަރުކުރުމަކުން ނަތީޖާ ނިކުންނާނެކަމަށް ގަބޫލުފުޅު ނުކުރައްވާކަމަށާއި، ސާފު ތަނެއްގެ ގޮތުގައި ފުރަމާލެ ބޭއްވޭނީ އެންމެންގެ އެއްބާރުލުން ލިބިގެންކަމަށް މޭޔަރު ވިދާޅުވިއެވެ.
"ކުނިއެޅުން މަނާ (ޖަހާފައިވާ) ރަސްމީ ބޯޑުތަކުގެ 100 ބޯޑު މާލެ ތެރޭގައި ހަރުކުރުން ކުރިޔަށް ދަނީ. ނަތީޖާ ރަނގަޅުވާނީ ކުނި ބެހެއްޓުން ހުއްޓާލާ މަގުތަކަކީ ރީތި ސާފުތާހިރު ރީތި ތަންތަނަށް ހެދުން އެއީ އެންމެންގެ ކަމެއްކަމަށް ދެކިގެން މަސައްކަތްކޮށްގެން"
މާލޭ ސިޓީގެ މޭޔަރު ޑރ މުއިއްޒު
މާލޭގެ އާންމު ތަންތަނުގެ ކުނި ނެގުމުގެ މަސައްކަތް މީގެކުރިން ހަވާލުކޮށްފައިވަނީ ވޭސްޓް މެނޭޖުމަންޓު ކޯޕަރޭޝަނަށެވެ. އެހެން ނަމަވެސް، ވެމްކޯއިން އެ މަސައްކަތް ކުރަމުންދަނީ އެންމެ އެދެވޭ ގޮތަށް ނޫންކަމަށް ބުނެ، މާލޭ ސިޓީ ކައުންސިލުން ވަނީ މާލޭގެ މަގުތަކާއި އާންމު ތަންތަނުގައި ހުންނަ ކުނި ނަގައި ސާފުކުރުމުގެ މަސައްކަތް ފަށާފައެވެ.
އެއާއެކު މާލޭ ސިޓީ ކައުންސިލުންވަނީ އާންމު އިޖްތިމާއީ ރައްކާތެރިކަމާއި ދުޅަހެޔޮކަން ކަށަވަރުކުރުމަށާއި، ފުރަމާލެއަކީ ސާފުތާހިރު ތަނަކަށް ހެދުމަށް ސިޓީ ކައުންސިލުން ކުރަމުންދާ މަސައްކަތަށް ރައްޔިތުން އެއްބާރުލުން ދެއްވުމަށް އެދިފައެވެ.
Advertisement
This content is created and paid for by advertisers and does not involve Voice Journalists
