ރައީސް ޔާމީން އަބްދުލްގައްޔޫމުގެ ނަންފުޅު ކުރިއަށް އޮތް ރިޔާސީ އިންތިޚާބުގެ ވޯޓު ކަރުދާސްކޮޅުގައި އޮންނާނެކަމަށް އެމަނިކުފާނުގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.
ޑރ ޖަމީލު އެފަދައިން ވިދާޅުވެފައި ވަނީ ރައީސް ޔާމީންގެ މައްސަލަ އިސްތިއުނާފު ކުރަން ބޭނުންވާ ހުރިހާ ލިޔެކިޔުމެއް ކޯޓުން ފޯރުކޮށްދިން ފަހުން ކުރެއްވި ޓްވީޓެއްގަ އެވެ.
ޑރ ޖަމީލު ވިދާޅުވީ އިސްތިއުނާފީ ކޯޓު ކުރިމަތީގައި އޮތީ އެތައ ރައްޔިތުންގެ ހައްގުތަކެއް ކަމަށެވެ. ދާދި އަވަހަށް އިބްރާހިމް މުހައްމަދު ސޯލިހުގެ ވެރިކަން ނިމި އަނިޔާވެރިކަމުގެ މައްޗަށް އަދުލުވެރިކަން ފާޅުވާނެކަމަށް ޑރ ޖަމީލު ވިދާޅުވި އެވެ.
އޭގެ އިތުރުން ޑރ ޖަމީލު ސިފަކުރެއްވި ގޮތުގައި ރައީސް ޔާމީން ޖަލަށްލީ ރައީސް ސޯލިހު އެމަނިކުފާނުގެ ކިބައިން ސިޔާސީގޮތުން ބަދަލުހިއްޕެވުމަށެވެ. އަދި އެ ބަދަލުހިފުމުގެ ތެރެއިން ރައީސް ސޯލިހު އަމަލުކުރައްވަމުން ގެންދަވަނީ ވަރަށް އަނިޔާވެރި ގޮތަކަށްކަމަށް ވިދާޅުވިއެވެ.
އެއާއެކުވެސް ޑރ ޖަމީލު ވިދާޅުވީ ރައީސް ޔާމީންގެ ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެ ކަމަށެވެ.
ވ އާރަށުގެ މައްސަލައާއި ގުޅިގެން ރައީސް ޔާމީންގެ މައްޗަށް ކުރި 11 އަހަރުގެ ހުކުމް އެމަނިކުފާނުގެ ފަރާތްޕުޅުން އިސްތިއުނާފުކުރުމަށް ވަނީ ނިންމާފައެވެ.
އިސްތިއުނާފު ކުރުމަށް ބޭނުންވާ މުހިންމު ލިޔުންތައް މިހާރު ކްރިމިނަލް ކޯޓުން ރައީސް ޔާމީންގެ ގާނޫނީ ޓީމާއި ހަވާލުކޮށްފައިވާއިރު، އިސްތިއުނާފު ކުރުމުގެ މަސައްކަތް ކުރަމުންދާކަމަށް ގާނޫނީ ޓީމުން ވަނީ ބުނެފައެވެ. އަދި އެ މައްސަލަ ފުރިހަމަ ދިރާސާއަކަށްފަހު ކަނޑައެޅިފައިވާ މުއްދަތުގެ ތެރޭގައި އިސްތިއުނާފު ކުރާނެކަމުގެ ޔަގީންކަންވެސް ގާނޫނީ ޓީމުން ދެއްވައެވެ.
Advertisement
This content is created and paid for by advertisers and does not involve Voice Journalists
