ވިލިމާލެއާއި ގުޅޭގޮތަށް ބަގީގެ ޚިދުމަތް ދިނުމަށް މާލޭ ސިޓީ ކައުންސިލުން ނިންމާފައިވަނިކޮށް މިނީ ބަހުގެ ޚިދުމަތް ކައިރި މުސްތަގުބަލެއްގައި ވިލިމާލޭގއި ފަށަން ސަރުކާރުން އިއުލާނު ކުރުމާއި ގުޅިގެން މާލޭ ސިޓީގެ މޭޔަރު ޑރ މުހައްމަދު މުއިއްޒު ފާޑުވިދާޅުވެއްޖެ އެވެ.
ވިލިމާލޭގައި އިލެކްޓްރިކް ބަގީގެ ޚިދުމަތް އަންނަ މަހު ކުރީކޮޅު ފަށިގެންދާނެ ކަމަށް މާލެ ސިޓީ ކައުންސިލުން އިއުލާނު ކުރުމާއި ވިދިގެން ކަހަލަ ގޮތަކަށް ސަރުކާރުންވެސް ވަނީ ވިލިމާލޭގައި މިނީބަހުގެ ޚިދުމަތް އަންނަ މަހު ތައާރަފު ކުރުމަށް މަސައްކަތް ކުރާކަން އިއުލާނުކޮށްފަ އެވެ.
އެގޮތުން ވިލިމާލޭގައި ބޭނުންކުރާނީ އެންމެ ފަހުން ގެނައި ތިމާވެއްޓާއި ރައްޓެހި ބަސްތަކެއްކަމަށް ސަރުކާރުން ވަނީ ބުނެފައެވެ.
އެކަމާއި ގުޅިގެން މޭޔަރު މުއިއްޒު ވަނީ ނުރުހުން ފާޅުކުރައްވާފަ އެވެ.
އެގޮތުން މުއިއްޒު ކުރެއްވި ޓްވީޓެއްގައި ވިދާޅުވީ ވިލިމާލެއަށް ޕަބްލިކް ޓްރާންސްޕޯޓު ބަސްތަކެއް ގެނައުމަކީ ރައްޔިތުން ބޭނުންވާކަމެއް ނޫން ކަމަށެވެ.
ބަގީގެ ޚިދުމަތް ފެށުމަށް ކައުންސިލުން ނިންމީ ރައްޔިތުންގެ ވިސްނުމާއި އެއްގޮތަށް ކަމަށާއި، ކައުންސިލުން އެފަދައިން ނިންމާފައިވަނިކޮށް ސަރުކާރުން އެކަމުގެ ތެރެއަށް ވަނުމަކީ ލާމަރުކަޒީ ނިޒާމާއި ބީރައްޓެހި އަމަލެއްކަމަށް މޭޔަރު ވަނީ ވިދާޅުވެފައެވެ.
ވިލިމާލޭގައި ބަގީގެ ޚިދުމަތް ދިނުމަށް ވެފައިވާ އެއްބަސްވުމާއި އެއްގޮތަށް ޚިދުމަތް ނުދޭތީ އެ އެއްބަސްވުން ބާތިލުކޮށް ޕަބްލިކް ޓްރާންސްޕޯޓްގެ ޚިދުމަތް ފެށުމަށް މާލޭ ސިޓީ ކައުންސިލުން ފާސް ކޮށްފައިވަނީ ފާއިތުވި އަހަރުގެ އޮގަސްޓު މަހުގެ ތެރޭގައެވެ.
މާލެ ސިޓީ ކައުންސިލުން ބުނީ، 17 އޯގަސްޓް 2022 ގައި ބޭއްވި މާލެ ސިޓީ ކައުންސިލްގެ 4 ވަނަ ދައުރުގެ 63 ވަނަ އާންމު ޖަލްސާގައި ނިންމާފައިވާ ފަދައިން ވިލިމާލޭގައި އިލެކްޓްރިކް ބަގީގެ ޚިދުމަތް ފެށުމަށް ބޭނުންވާ 10 ބަގީ މިމަހު ފަހުކޮޅު މާލެ ގެނެވިގެންދާނެ ކަމަށެވެ.
އަދި އަންނަ ފެބްރުއަރީމަހުގެ ކުރީކޮޅު އެ ޚިދުމަތް ފެށިގެން ދާނެ ކަމަށްވެސް އެ ކައުންސިލުން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
